211024日晚22°C 68%：‘龍城’搵食

昨本想去九龍城食清真館既牛肉包，順便見識宋皇台站。但最怕排隊，周末去攞苦離辛，臨時只能改在茶餐廳解決。但總算食咗個久違既港式脆炒麪。

九龍城作為小食兼食材town，縱橫各有3、4條街，規模在18區裡應算數一數二，怪不得住西貢既發哥一家也經常揸車離幫襯。

九龍城的另一個特色當然係泰國town，加上泰華多源出潮州，因此也是潮食街。有個臨街攤檔既食品甚至只有泰文。唔係華人唔食得、唔敢食呀嘛？

我年來開始鍾意買餸。但呢個年紀先離學，自己又唔夠精靈，滿足下好奇者！買肉唔識豬、牛既部位；買菜只識分幾種葉菜、瓜豆...。但新鮮、老嫩、來源、安全度...一概唔知。

只知而家講究有機，價錢比一般貴三、四倍。但聽講好多半桶水，玩文字遊戲。係人都知，唔落藥，會有蟲蛀，菜葉有窿。但我如果賣有機都識講：而家係塑膠棚種，冇蟲架！我唯一見過有窿既菜，係新界北阿婆同孫女係街邊擺賣個幾棵，可信係自己種既。但平時係市區邊買得到？

我最白癡既係乾貨，十種識唔到一種。即使聽過名，亦唔知點食、為好食定為健康，更莫說自己整離食。乾貨鋪基本上只能睇下的調味品。

年前家人買咗包新加坡出既Lasa（叻沙）公仔面。好味，麵同湯都靚，但一人份量要20幾元。由此開始注意乾貨鋪有冇叻沙醬，想用離煮香港麵。如是發現，除咗專賣菲傭、印傭家鄉食品既小店，仲有專賣星馬泰食品既鋪頭。除咗叻沙、沙爹，仲有架咉，買離搽麵包，覺得好食過西人jam。然後轉念先知，所謂“satay沙爹”其實係閩南話既“沙茶”，因為“茶”發音“爹”。

總之，人老咗，但求平安健康，樂趣也趨於平凡。對買餸縱使無知，但無知也是一種樂趣，自己開心就好。