2020年1月26日 星期日

200126日晚15°C 78%:我地有史第一次不如澳門

自有記憶以來,澳門凡事跟香港。呢次針對武肺,終於叻過我地:步步都行先一兩日。咬住牙根,寧可短期賠上收入佔庫房九成的旅遊博彩業。城市就如人,長線的「品格」更緊要。   
    反觀我地,旅遊佔經濟並非壓倒性,但處處畏首畏尾,不見棺材不流淚。
    到今晨仲係度擠牙膏,話封關唔可行,但可考慮逐步縮短通關時間。
    人決策的速度以小時計,執行以日計。但病毒散播與飛機和高鐵的時速同步。等政府按常理作出反應,人都死!講呢的嘢既人唔用腦!
    再講,而家的人咁有錢,旅費咁cheap,即便呢刻封關,停嗮內地來港既班機、高鐵,都難免會有個別武漢過客,多買一程機票,由南京經阿拉木圖、西伯利亞,過一晚再飛香港。鬼check到乜?
     但封關至少讓市民知道:政府爲大家必盡人事,做到120%,成事在天。到時即便有港人在港交差感染,只會怪有衰人偷入離,唔會怪政府。而家就有乜頭暈身慶,怨死PK林鄭。政府唔做到足,市民完全會同情醫護,即便工業行動似乎有違道德責任。
    何況,習近平開口後,內地幾乎日日都向鎖國邁進。出國團、旅行團即日取消。往年初一30個省市電影票房以億元計,昨只有172萬,說明全國省市都唔敢怠慢,市民也不得不收斂。林鄭仲驚乜Q?
    今午路經著名景點,仍可見旅遊團。相信係獲領隊分派,人人都有口罩。但只要其中一個有病,香港就淪陷。到時所賺既幾十億團費都唔夠貼經濟同城市令譽既損失。
   怪唔得咁多人咁憎呢個政府!

200125六初一凌晨19°C 94%:林鄭亦步亦趨

    暖。下午照例去妻家四代同堂團拜。但除咗玩三個小朋友,唯一既話題係「疫埠」,打定輸數。雖然按武漢官方數字,過去24小時尚算穩定。
   習近平今首次主持防疫會議,「咁啱」林鄭也首次開記招,收緊對內地抵港客既監控。你信佢純屬自發,而唔係事前收到風甚至指示,與內地防疫同步協調?
   只有這樣纔可以解釋,拒絕對內地人封城。
   今天最勁的消息:相信是用數學程式模擬病毒散播,有英美專家相信:武漢此刻已有25萬人感染,百倍於官方確診的數字。
   我還是那句:兩個數字相差太遠,唔敢相信咁離譜;但內地慣性冇信用,對外界的揣測又唔敢唔信。
   咁「厲害」既預測,與港專家說呢幾日既防護的關鍵時刻,互相呼應。

2020年1月24日 星期五

200124五午後微雨21°C 90%:病毒小休等我地團年?

    武肺連飆幾日後,至今午後爲止,總算靜下來。
    或只是蓄勢待發,「玩埋」二月應該冇得走。
    今天最戲劇性的是:菲律賓將昨自武漢飛抵的135人全數遣返。
    
    疫症攬炒的效果比反修例勁千百倍。反對者乘機咒詛:She dynasty冧啦!大標題曰〈「三五天後勢爆騷亂」;辛亥革命因封城戒嚴提前爆發;社評:封城是騷 封口是真〉。
今晚團年,上個「欖角炒豬肺」啦!

   今次恭喜發財,尤其係內地,怕要學的菲姐:一家大細係屋企圍圈座,用神棍夾住個手機繞場一週,輪流拱手!利是就電子過數啦!

   至於港府被媽反應慢,我信根源係商港性格:凡事爲生意,最怕得罪人。今閱報,原來我地係武漢都駐有經貿辦。一直唔敢限制高鐵來客,講到底就係怕得罪內地省市。高鐵沿途上落,點知個客來自邊度。內地省市縱未必敢杯葛香港,但唔比着數好容易。
    因此,港府個日突然高調開記招,唔排除係事前接報:今日會就武肺有重要指示。否則港唔敢對內地來客出招。
    習近平開聲,武漢先不得不封城,趕建隔離醫院。否則必繼續死冚,因爲經濟利益太大。你經濟落,隔離省市就乘機騎住上。這就是發展壓倒一切的死症。
    而家話就話要環保、效率。但中國人幾千年都實用掛帥,骨子裏必然走精面。所以點解對外冇乜人信。
    呢次過年,出入平安、身體健康就好,發財免問!

2020年1月23日 星期四

200123四晚22°C 87%:開始恐慌了!

    沒料到,大主席日前開金口後,武肺反而急劇惡化,進入爆炸性階段。
    對世人來說,最驚人的當然是武漢今晨10AM起封城,外人不得進城,城裏的人不准離開。電視上,城裏街上無行人,只有排隊購物「備戰」的人龍。公路上的車龍不見首不見尾,十足逃難。
   作出宣佈幾個小時後就成功封城,這當然是威權國家的「厲害」。
   對港人來說,最驚人的怕係出身內地的港專家走訪疫區後不歡而回,說這次的爆發或10倍於沙士。
   但我更關注的是:昨天死亡的人數突然呈井噴,一天9(或8)人, 相當於武肺有統計以來累計的數字。即使其中多屬長者、長期病患,當局也有責任講明。否則公衆會恐慌:病毒突變,無藥可醫,又見沙士?
   今午路經港鐵上蓋的大商場,感覺上,戴口罩的人或有一成。港人開始恐慌。
   若此,由這一刻起,任何風吹草動都可能令問題失控。
   諷刺的是,反修例運動日趨疲軟之時,來了最佳的接班人:疫情作爲反內地最佳的話題,任何不利的發展均可算在上面和林鄭頭上。
   一衆忍者正好趁武肺今後擴散的一兩個月,休養生息,伺機再來。
   快請我們很厲害的「雞珍」以前世衛總幹事的權威出馬,帶領14億人止疫制肺。

2020年1月22日 星期三

200122三夜21°C 87%:重演南來播毒既沙士故事?

    今午gym班歲晚收爐,但「武肺」相反歲晚開打。社會可能日內就會恐慌。不得不留幾句。
    形勢突然雪崩。昨晚以爲港確診係日內既事。不料今日就已成真。AD好識對焦:即刻突出
   〈強國〉人藉高鐵南來禍港。
    加上其〈同行家人由尖嘴酒店飛抵馬尼拉〉,不用說使人想起當年沙士既毒源:廣州有老教授來港住酒店,從而一發不可收拾,最終埋單299人。
    說也巧,上月我去長沙灣政府合署辦事,回程特地路過欽州街差館對面既舊居,然後學當年返學,沿荔枝角道行去彌敦道,途中路經當年的沙士大酒店。
    如今「第一酒店」若由太子移到尖嘴,多少反映17年來,內地經濟能力的升段。
    武肺既已殺到,怕要兩三個月才能過去。頭兩個月會係蔓延、深化期。最後個個月才可望subside。眼前毒性不強。但最怕此後變種,演化出致命而無藥可醫的新沙士。
    今午疫症已成爲街上唯一的議題,人人都嗷嗷聲。雖未至於恐慌,但普遍相信裏面必定隱瞞,而且事發至今可能已呃咗好耐。社會上對防疫普遍陽奉陰違,表面交差,背地裏依然故我。利益決定一切,只要有利可圖,錢照賺,理得你咁多。
    這就是中國的國情。鍾唔意由你。

200122三午雲21°C 78%:鼠年不利

    動盪已七個半月,執法人員與「暴徒」在街頭對抗應過百次。有個別重傷,幸未有人殉職。
    不料捱到過年前夕,反有3人死於公務意外,與反修例無猶。與此同時,武肺形勢急轉直下。行內傳說,已有郊區度假營被暗中改爲隔離營。希望冇人三十初一要係營內一支公過。
    鼠年肯定開年不利,還盼否極泰來。

    其實,我一直想講幾個港人黃藍都懶理既國際議題:
    伊朗稱將客機當來襲的導彈擊落,令176人枉死;
    日產前董事長戈恩在日待審期間,潛逃去黎巴嫩;
    大盜季炳雄在港刑滿後解返美。

    這裏先講最近香港個單:
    對呢位季大佬有興趣,因爲原來佢係美國居民/公民,呢次以自由身返回紐約。我大大話話住過紐約7年,而且係舊唐人街編報紙,行幾分鐘就係當年福清、飛龍(?)...幫槍戰既堂口、地下賭場、唐餐館。唔知呢位大佬係唔係當年唐人街既靚呢?
    至於後來來港搵食,怕係唐人街市場太細,要搵大水。
    仲有,移民去美國之前,係港人定陸人?

    跟機飛去紐約既港記話,季生抵達大紐約區既Newark機場後,對移民官自稱US resident(亦即可居住工作,但不享有政治權利既居民)。但我估事實上應該係已入籍既公民。
    我都做過US resident。按例不能離開美國超過半年,否則入境時可被即場吊銷居留權,打回頭。呢位季先生在港犯大案,坐監十幾年。若只係居民,美國點會俾佢再入境,唔知會唔會再爆大鑊?
   只有居留權既外人,在美國如果犯大案,刑滿後甚至會遞解出境,冇望再回美。
    所以我估,呢位季生來港犯案前已入籍,有權隨時回美。美國依法一定要收。佢甚至可能今年11月有票選總統。
    但我不解的是:佢自香港刑滿個日起,依法係自由人。港方雖有權遞解冇居留權既人出境,但乘坐既UA係美國flag carrier,亦即機艙係美國領土,港方人員冇權執法。照理季生上機後有權換位,唔俾港方人員夾住坐。港方奈佢何。
    而對美國來說,公民季生係自己領土返國途中,理應唔受他人騷擾。現在俾6條港人大漢夾住坐15個鐘,肯定於法無據,而係美方默許。咁係乜嘢安排?
    當然,從美方來說,無權派執法人員陪季生坐,因爲佢冇犯美國法律。但讓其他司法管轄權既人陪坐,係唔係侵犯美國公民既人權?
    以上純粹係講法治,唔係想幫人出頭、挑起事端。而家凡事講政治正確。無論建制、反建制,對汪洋大盜避之唯恐不及。

    希望日人所謂已贖罪者好好過下半生。

2020年1月21日 星期二

200121二深夜19°C 81%:好彩,我...

   習主席昨就武肺首開金口。特區同日開記招,今更由署理特首強調最高戒備、最壞打算。不可能是偶然。
   香港此前lax出於商港本性:最怕有損貿易旅遊,也怕得罪內地省市。深圳一市既GDP就惡過我地。
   但病毒至此或積夠了力度,突然惡飆,遍及韓、日、泰、深...,團團圍住港澳。證實可人傳人後,借助春節人流,港澳相信日內就會加入陣營。
   港開始緊張。接着呢兩三日,只要感染、死亡數字再飆一次,就會升級爲恐慌。
   但我希望冇估錯:病毒顯著弱過沙士。只要不突變,縱使會傳開,但唔至於冇得醫。只不過辛苦了醫護人員。
   今晨落街辦事。行行下路,友人從外地來WhatsApp,呻每逢外遊就股災。這一刻浸緊溫泉都要開手機出貨。
   我因爲冇錢玩,通常每日laap一次恆指就算數。聽見"股災",以爲有人作大講笑。原來收市真係跌800點,>2.5%。
   更"厲害"既係,據說今日有人掃醫藥股。我最衰今日剛續咗個定期,否則聽日一於炒內地既蒜頭、大蔥。
   不過好在:正想訂機票外出,而家閘住。最怕香港過年後亦變疫埠,去邊度落機都俾人額外招呼。