211008五3號波雨25°C 95%：好打姐真喺唔玩？

清晨起身已3號，預告會全日。好在擒日去咗行track，今日睇罷要喺家打躉。

謝留言。林鄭若真選擇做國家領導人，接替的會係comeback kid定係近日輿論睇好既大掌櫃？抑或中央另有心水？

講到底，國安為先用法家，抑或修補裂痕用冇乜菱角者？

但市民又點睇？

在籠中人眼中，邊個會係lesser of two evils?

無本地確診50日後，擒日又再破戒。恐怕又會收緊。

反覆係呢種新冠既特性。03年以爲沙士恐怖，因爲冇藥醫。原來而家呢種先勁：全球跪低近兩年，唔知仲要玩幾耐。近月既新規律係：

1. Delta暫時仍無敵，所有人打完2針照領嘢。而且可能冇症狀，通街行。

2. Delta話你精我都精。你人類藉全球化致富，我藉全球化繁衍，相得益彰。你地人類鍾意往來各地，我又最鍾意hitchhike！

3. 研究發現：全球最通行既西方疫苗BNO/Pfizer/復必泰，打2針只能頂半年，半年後抗體淨番一半。Delta暗裡偷笑，怪唔得一攻就冧。

我雖然唔係最早打，而家都半年，對Delta只係“獨臂刀”，頂唔住預咗。不過，聽講，打針同唔打既分別，唔係唔會感染，只係肺冇咁容易穿、人冇咁容易死。

怕好多人等緊第三針。但而家林鄭忙於20年後北邊既新都大計，唔得閒理眼前既小事。

再說，即使而家有第三針打，都唔知點揀。有說溝針好過三針一樣。但香港只有復必泰同科興，溝針冇得揀。