211012二晚8號靜25°C 66%：睇牙之感恩

周末打咗2日風，昨周一剛放晴，今午就又再見8號。兩連風，市民掃食物，似乎重厲害過去年初見疫情。 

但昨好感恩。一年前去杜牙根，剛做完前奏就頂唔住。接連兩次，未開始車牙就要中止，更要人離接番屋企。 

爛牙終要見家翁，今一年後再試。自己事先食藥頂住。醫生也記得我既麻煩，前奏做咗重要既變動，結果順利完成。雖然全程用硬物撐大個口，嘴脣痹到浮腫，但唔痛唔暈，完成後可以自己離開醫務所。Hallelujah！也好多謝醫生。 

杜一隻牙根前後要見4次醫生，每次隔一個禮拜。開咗第一次頭，先至能做接着個3次。否則隻牙幾咁唔舒服都冇法子。 

睇咗成年牙後，覺得牙醫或者似骨科醫生。一般外科手術切割軟組織，要輕手、細緻，以防切過界。聯埋傷口時，又似巧手既裁縫。 

但挑牙、車牙好用力，而且力度角度要準，以防車過籠，似車牀打磨。一日車足八個鐘，都幾辛苦。加上成套設備、有護士在旁幫手...。怪不得收費以千爲單位。 

相信也正因爲，睇一個症至少要半個鐘，除非疑難雜症，整牙基本上冇公家症（除非係公務員）。過去呢兩年，發覺有好幾隻牙有事，都幾係嘢！ 

但我以前啲牙OK。事後念番，懷疑係前年入院，戴住個「龜殼」，在牀上幾乎平臥個半月。上身同水平成30度，係病牀上刷牙，用個杯接水，漱幾口就算。我估，蛀牙就係咁煉成既。由此看，世間事，有得必有失。我唔使做手術，避過手術風險，無須等傷口復原。但反過來製造爛牙，頭尾要整幾年，或者10萬起跳。 

但得失相抵，或者仍有着數。我相信，呢的安排，多多少少係天意。 

日前，海外一個熟人走了。天年，但出事一兩天就離去，顯見人到了個日，再也留不住。心裡要有所準備，接受命運。 

寫至此，Yahoo轉述SCMP話：中央交俾港府500項待辦的事。細睇原來指中聯辦在港傾巢而出訪貧問苦，收集了6,000多份意見，分成內地處理與交特區處理兩類。

我今朝看到這則消息，本能地想起古時既欽差，手執御賜尚方寶劍，可先斬後奏。地方官見咗就打冷戰。

何況還有半年就面對連任的問題。