211030六Halloween晚24°C 77%：對澳洲有的好奇

澳洲基於意識形態，近年與中國頂心頂肺。而家更買美製核潛艇‘再武裝’，話明係防中。中國照例用14億人的購買力來反制。

港人有時因此而得益。月前龍蝦輸華落閘，以一斤百元的廉價‘流落’香江，港人樂得大啖。但與此同時，億元計的澳洲龍蝦要屈蛇北上，港、內偵緝好唔得閒。不過，再過兩年，港日益與內看齊，恐怕也唔會再收留內地唔要既澳洲產品。

澳與華鬥，反過來也益咗‘反制’的港人。近日新增“Hong Kong Stream”計劃，吸收在澳大專畢業或有技術的港人居留，97年後出生無BNO者也有份。

我冇去過澳洲。以前覺得似美國：天大地大（人口密度仲低過美國），自然環境靚。但我對海灘陽光麻麻，鍾意文化歷史多的。

後來聽去過既港人講：澳洲物價貴，甚至貴過歐洲。唔係好明：地廣人稀，農礦豐饒，食唔嗮，使唔嗮，非出口不可，自己又點會捱貴嘢！或者係福利好，政府大使，稅重。好多年前就聽澳洲番離既朋友講，有單身媽獨力湊4個仔女，全靠領津貼，因為根本分唔到身打工。

我冇去澳洲，還因為北半球人既偏見，好難接受聖誕著住泳衣通街行。

但年來睇過啲澳洲歷史和劇集，明白每個地方睇深的，都可以揾到趣味。今後如果夠錢又有體力，都想去見識下。

有關澳洲既劇集，最Like既係“Pine Gap”，講澳洲中部in the middle of nowhere有美、澳合設的情報基地，監聽全球由海底電纜到太空衛星既電子通訊，以防有人對美、澳和盟友不利。

第二Like既係澳洲原居民扮探長既刑偵劇“Mystery Road”第一季。主角有型，節奏明快。