疫情邁向兩年。以前啲人悲陰陽永隔，而家縱使彼此在陽，也可Zoom而不可及。港或有大半家庭分隔兩地。新到來的小生命從未見過彼岸的家人，更遑論看著其成長。
過去一年，香港多次放聲氣話即將可通關。我信以爲真，每次都預祝有摯親在深圳的友人。但每次都落空，此後唔敢再提。
如今還有半年就投票，林鄭肯定以通關求連任。但睇近日內地的抗疫措施，唔怕講：港凍過水！
上周，澳門突再見確診，珠海即日封關，雙方好多即日過關的人番唔到屋企。（拱北<->珠海只須步行幾百米，每日有成千上萬人往來返工買餸飲茶。唔同香港，與深圳隔幾公里既叢林，非搭車不可，唯返工返學的人先每日過關。）
澳門特首公開道歉後，與珠海斟咗兩日。剛打算開番關，澳門又見確診，於是又告吹。兩邊既人自然又媽！
今日睇建制報：〈新疆爆疫 黃金周遊客滯留 伊犁州飛機火車公路全停〉。話封就封，滴水不漏，病毒當然冇走雞。但試想你係遊客，回家前一刻突然封城，臨時要請假、俾多筆酒店隔離費，會點念？
講到底，疫情難免反覆。內地求全，一見case就全面圍封，借用張藝謀戲名，一個都不能漏。香港慣咗散漫、自己執生，點說服上面開關？
咁講，唔係主張好似內地咁嚴。但客觀上，形勢俾人弱，點玩呀？死心啦！
沒有留言:
張貼留言