190329五Day21午：也諗下自己

今天入院滿三週。謝留言。
前文所謂的病房鄉音，工作性質類似在家照顧長者的外傭，差別是一對幾(可能是十幾二十個病人)與一對一(雇主)。
照顧一個不能自理的長者就夠辛苦，巡迴照顧十幾人就更要快手，否則根本無法兼顧。我唔會要求阿姐換片抹身時有笑容、動作輕柔、同我傾偈，好似按摩服務。
鄉音與外傭真正的分別在於，前者與我們同文同種，是港人的一分子。後者只能為我們打工，一唔做就要離港。
這樣說，並非為外傭求居留。而是說，鄉音作為新港人，為我地孭好多人怕唔願做既工，我地應感激。住咗三個禮拜，未見同房有明顯既投訴。係港人多投訴的今日，已好難得。
其實，世上任何地方，都有窮區人去富區做富區人唔想做既嘢。他們在富區的角落裡辛勞，富區人才得以enjoy life、追夢。十幾年前，香港街頭就已常見南亞掘路工。
反過來，外來人裡任何時間都有衰人，一個就足以令我地驚晒成群。問題是佔幾多。不能以個別來否定絕大多數幫咗我地既外人。
對鄉音亦如是。大陸人的衰，傳媒上罄竹難書。關鍵在中共頭三十年摧毀了中華傳統的道德，自己提不出有公信力的替代品。14億人道德真空，在「發展就是硬道理」下，發財出頭不擇手段，造成千年未見的變態社會。中共今天相信也知衰。但只要繼續追強國夢，國人只會更自大，更招人嫌。
但14億人，即使有百分之幾衰就已好可怕，其餘九成幾的老實人都孭鑊。
但呢的外來的正常人通常在社會的角落裡出入，中產主流好少見。我如果唔係瞓床三週，都唔會見到咁多鄉音。如果冇咗的阿姐，唔敢想像病房點樣維持運作。個時就係死得人多。
今閱報，〈投訴文化加劇　前線壓力大 港微笑指數全球尾四　服務業笑唔出〉。呢個就係港人富裕後的病態，盲目地要與全世界最文明先進的地區，例如北歐看齊。但人地面積係香港千百倍，最多不過一千萬，人口壓力小，基層薪水係香港好幾倍，福利更好N倍。但稅也重幾倍。
同樣重要既係，人地有千幾年的基督教背景，從細就受謙和關愛既環境熏陶，唔係我地呢種競爭性心態，驚執輸，又認叻，富裕後更變得厭尖腥悶。將他人的服務視為理所當然，要求多，唔該少。認為有要求、識揀擇先係有taste，社會先會進步。
惡性循環，為你服務戰戰兢兢，純粹為錢；接受服務覺得俾錢就心安理得，冇的感恩。
我地開口鬧人之前，怕先要諗下自己。