190316六午後病房外望薄霧：病房的夜闌

病房大約晚10點-第日朝早7點熄燈熄電視，讓全房病人入睡。期間9個鐘，照理24小時裡最安靜。
但在幾個病友共用的病房裡，這並非必然。有時有病友發開口夢，半清醒地自言自語，甚至因為不適而呼叫。
夜闌人靜，即使鄰房病友的叫聲，亦清晰可聞。而且，不適時的呼喊是持續的，不會叫幾聲就收。
我40年前在紐約住私院，由於被疑有傳染性，被分發到癌症病房，半夜就聽到響徹走廊的嚎叫，相信是癌症的痛楚。反過來，我老母在港入公院，半夜就中氣十足地自言自語，可能講足幾個鐘。佢夠老，夠惡，係人都怕咗佢。
因此，只要一個病友比較大聲，相連的幾個病房都會聽到。
多數病友都唔會因此而失眠。但我這次入院頭六日，就因為傷腰，可能影響到基本，訓唔著，聽足鄰床通宵的故事。
骨科病房通常收創傷，跌親撞到骨折，多數係長者，甚至大過我。年紀反映人生，半夜聽的故事會係打日本仔，而唔係想阿嬌、呻老細。
但昨晚則反過來，我六日來第一次訓著，大概凌晨入睡，但未天光 jaat醒。鄰房傳來反覆的訴求，「唔該，阿哥，好痛呀，綁住我...剪咗佢...唔該呀...既」。就呢幾句講足個幾鐘。
但發音清晰，唔係痛到嗌個種。相信係手腳因傷或者手術後用系帶被「固定」在床上，唔郁得，加上傷處本身痛，長夜難捱。
我可以理解，但直覺上屬於兩難。被綁係醫療上肯定有需要，通常是保護傷口，等癒合。我呢次裂咗一節腰椎，到這一刻已訓足七日，不但不能落床，連坐起都唔得。
醫生話最好平躺，但明白平躺一周十日既痛苦，「恩賜」床頭最高傾斜30度。我為免處處麻煩人，自己飲水。但30度既頭唔夠高，用飲管時要打側身，擰歪頭。好在做 gym時熱身有一招係左右扭頭。食野重難。
講回半夜呻既病友，點樣可以幫到佢。止痛藥如果可以舒痛幫佢(和鄰床)入睡，相信醫護都考慮過。但如果「痛」指被綁之苦，恐怕就無能無力，而要靠這位病友自己。不同的人承受力可以差天同地。承受力弱怎麼好？食安眠藥？