190321四Day 13：脊椎係骨，但又唔同一般骨

傷腰椎，但幸而四肢無礙，唯套住龜殼臥床等自療。連續12日唔落得地，床頭最高30度，角度再大會痛，大小便無法自理。
期間內更幾未訓過。12x24小時除咗量血壓、抽血、食藥、進餐、等探病...做乜好？
試過睇書。但坐唔直，臥床舉起本書睇，書背後係天花板既燈，chaan到應，字反而好暗。
最後唯用手機。但用4G冇理由streaming睇劇，唯有睇文字新聞。
此外，老來入院，也更關心人生。唔係驚死，而係呢方面從小弱智，一般人早就明既道理，我而家先有所感。
因此，上博成為臥床既紅股。
骨科病房多數係長者跌親骨折，主治係打釘駁骨換骹。入院通常兩日就做手術，餘下係幾個月既康復期。
傷脊椎係少數。脊椎中空，包住大量神經，郁到一條都可能終身影響四肢既感覺、活動能力。
因此，脊椎手術有專門既骨科醫生做，而且可能要有神經科醫生在場，要夾時間。期間又要先做突發事件送來既緊急個案。非緊急既脊椎病人唯臥床等空檔，一周十日唔奇，忍！