190318一凌晨病床：我冇乜complaint

醫療問題聽得多。傳媒出於天職，公眾基於同理心，尤其敏感。但限於時間和專業，難以深究因果上的細節，疑點很自然地歸病人得益。
這類事故又大都見於公立醫院，更顯得政府冇瓣掂。
今天新聞就說，政黨民調指57%亦即將近六成市民不滿意公營醫療，嫌：輪候耐；病房逼；唔夠醫護。
我算好彩，上週六上午先入急症室，大約中午轉入公立醫院。至今頭尾九日，臥床唔落得地，唔轉得身，連坐都坐唔直。
不僅食藥、打針，幾乎所有生理活動都要人幫先做得到。一日24小時，行埋我床邊做野既人，怕有三四十。So far ，冇乜 complaint。我好感激。
我同房既病友都係唔落得床既，而且可能入離仲早過我。側看為他們的服務，也不比我的差。
當然，話一次complaint 都冇，你都唔好信。有一次病友無法大便(創傷、臥床病人普遍既問題，包括我)，谷住，要求放便。醫護由聽到到埋離幫病友鬆嗮，中間可能隔咗個幾鐘。期間病友call過好多次。事後難免呻下，但未聽說投訴。
我有一次同樣的問題，由開聲到獲得relieve 也大概有兩個鐘。肚好漲，但未至於痛苦，用耐性忍過去。
以我粗略的觀察，放便延後 不一定是拖拉，而可能是病房合計可能上百種工作，各有先後次序，輪住上。例如，放便後接著要換片，要等負責幫病人清理的病房助理，先完成其他病房預定的工作，可以抽身幫個別病人，而不能丟低其他病房趕過黎。否則其他病房怕會投訴。放便到底不算危急問題。
後來同人講起，跌到骨裂長時間臥床雖然認真黑，但由於出事地點，被送來呢間公院則是一幸。醫院相對較新、較寬敞。

骨科病房又多屬創傷，尤多長者跌斷腳，唔同內科、婦科病房，冇流感、糖尿、中風、癌症、母嬰...呢類。住了將近十日，未聞有社會話題的新移民問題。加上公院所屬的地區人口和階層算是中等 ，未見文初民調的兩大complaints。
一點了，要嘗試入睡。過去九日幾乎未睡過。清晨七點，病房就轉入high gear，週一更是病房一 週最忙的一天。要有精力接受治理。