190303日晴23°C 83%：建制的「偉言」

   社會進化至此，建制不少人的觀念仍停留在三十年前的順民年代，又怪唔得的後生鄙視。
   延長限奶令若係干預自由市場，則公營的房屋、醫療、教育、交通...都應私有化。萬億MPF撥歸私企，此後回復個人自決是否儲錢退休。講呢句話既尊貴議員怕要上去黨校接受再教育，看上面是否支持。
   大學生衝擊校方無疑過火。但上綱上線到「黑社會」，則呢種黑社會恐怕連內地都有。三十年前的學生就曾在人民大會堂的鏡頭前當眾「窒」十幾億人的總理，句句揪心，對李鵬來說肯定係一生既奇恥大辱。但學生怕會說：點呀，拉我打靶啊？！
   再遠一些，五十年前的法國，學生受中國文革激發，上街重演法國大革命。主政的戴高樂係民族英雄，明知打唔過希特拉都唔低頭。但對呢班「黑社會」冇符，只好悻悻地落台。
   這並非說學生有理、激進英雄。但行動來自思想。學生的思想已發展到這地步，心藥還需心藥醫。你冇說服力，靠懲處愈壓愈弊。本港年來有幾十個社運青年收監。有邊個出監後悔不當初，被建制convert到？他們或暫時隱姓埋名，但十年二十年後的社運，恐怕又見他們。經長期潛心修煉、埋頭實幹後，到時建制更難捱。
   香港第一代既民主派，絕大多數係六七十年代既社運中堅--怕除咗林鄭。至今仍不時上街，他日即使坐輪椅怕都唔會放棄。
   鬧學生黑社會既前朝寵臣，是否受中國特色既社會主義啓發，想學人地「維穩」。但可惜香港的法例唔配合，也冇咁強既棍棒力。若此，又怪唔得泛民甚至近半市民不Like大灣區。香港入嗮大灣區後，話不定內地段有特設機構處置呢的香港「黑社會」。