201208二晚20°C 62%：我多咗防疫誘因

今晨依約抵達辦事地點才接到電話：延期，另行通知。由於事件的性質，或與疫情有關。

當局疏忽檢測後才來收網補鑊，無法制止‘放生一條邨累百業’的閒言。

第四波果然勁過第三波。差別不在確診數，而在無厘頭案佔1/4-1/3。唔好彩既話，只要有一個無厘頭係超級傳播源，佢唔知道自己身有嘢，卻有如噴霧機咁通街行，十日八日後，可能真係搞到要局部lockdown。

有咁啱得咁橋，呢波疫情，我撞彩有close to close encounter，增添了我防疫的誘因。原來，因疫情而入營分兩級：第1級陽性確診，入亞博/方艙觀察、治療；第2級與確診者密切接觸但本人檢驗陰性，入市郊‘度假’營，醫療唔跟身。

用近日反修例名人食官司打個唔係幾好聽既比方，確診有如定罪入獄，外界不能送物件來支援；密切接觸但檢驗陰性有如不得保釋、還押候審，外界早午可送乾糧（公仔麵、蛋糕、餅乾之類，不包括冷熱熟食）。

或因港人識飲識食，針對入營的complain多數係飲食：唔好食，唔夠食（可能也因爲近日凍，房內一支公，無聊之下覺得特別餓）。但港有錢、有飲食業infrastructure，營友的早午晚三餐爲何不能多幾樣選擇：basic免費，但提供兩三種較好的自費，例如40、60、80蚊一餐。

第四波同第三波相隔約4個月。第五波最好拖到夏天先離，等醫護、安老院打咗第一輪疫苗先。萬一拖唔住，要吸收第三、四波慢半拍既教訓，於將燃之際截住火頭。