210131日晚19°C 77%：長痛不如短痛

 BNO DQ日。今起不能再用BNO進出香港。下一步怕係DQ居港權。

我冇資格攞BNO，你或者話我講風涼話。但我的確覺得，BNO與中國籍劃清界限，即使對BNO族也是好事。

中方說，BNO此後不獲領事保護。但反過來，此後也再冇ambiguity：BNO就係準英國公民。在外萬一遇事，就學電影裡的美國人，向途人高呼：“British citizen. Call the Embassy.”唔使三心兩意，搵中國領事定英國領事好？

他日回港或有需要進入內地，萬一有困難，同樣係通知英領事。中國也當你準英國人辦。雖然，現在不像開放改革初期，西方人在華有麻煩，驅逐出境了事。如今出事，英領事怕也保唔到你。但這樣也好，那就好自爲之，老虎頭上勿釘蝨乸。

以BNO獲居英權後，可信仍可回港工作居住。只不過要住滿7年，先可以攞番3粒星。期間冇福利。但這類人多屬中產，在港時就唔靠公屋、綜援，仔女可讀直資，醫療買自保。回流冇福利問題不大。至於出身基層的BNO，英國的福利唔會差過香港，醫療更完全公營，最多遷英後唔回流囉！

失卻居港權，最明顯的損失只係冇錢派。但反過來，對港納稅人比較公平。而家就算移咗民大半世都有得分，甚至有人飛番離，用長者醫療券配眼鏡。

國籍分家長遠是好的。但短期內，成百萬雙重國籍的港人失去一半權利，當然嗷嗷聲。

加拿大日前說，擔心30萬在港的公民失卻領事保護權。此數若可靠，恐怕九成五係華裔。由此猜，英、美、加、澳、紐在港的港裔公民合計怕過百萬。按中方心理看，恐怕短期內都會繼BNO，逼港人在五眼籍或中國籍之間擇一。

不用說，此類人到時多會保留外籍，放棄居港權。一時之間有點痛苦，但長遠釐清個人和國家的責任，其實是好事。