港認真唔好命，疫情放緩，政爭就飆升。
BNO移英大計後日開跑。有說頭一年會有12萬人走。但我估至少多一倍。
以事論事，唔係叫人走。呢次唔同九七前夕。國安法生效只7個月，中港幾乎每周都在趨同。今日就話買電話卡要實名。想手握居英權繼續在港享高薪，冇咁大隻蛤蟆隨街跳！
不妨利申：我只有三粒星+特區護照，冇其他身份。冇念過可見既將來會生變。原因好簡單：人老錢唔多，西方唔Like，我又憎揸車。非移民不可，或只有台灣的生活方式可接受。但以目前形勢看，最怕未落腳，已經有人殺到離。
而家念番起，我呢代人係香港已可算遺老。細個跟阿爸偷渡離，唔係香港出世，冇資格攞BNO。
當時大陸出世想攞BNO，先要申請入「英籍」。但唔係真既英國人，而只係BNO級既英國海外居民。手續係搵兩位太平紳士sponsor，登報申請歸化，確保冇人反對。我阿爸係lao sung，本地人都唔識多個，邊度去搵太平紳士？人地三唔識七，又邊會咁好死幫你，除非磅水。再講，登報紙也要錢。阿爸同我寄人籬下，食人地既飯，念都唔使念。
因此，大陸出世既港人，九七前唯一可領既旅遊證件係綠皮CI(Certificate of Identity身份證明書)。當時全世界只有新加坡免簽。
記得60年代中第一次離港，唔識嘢。入境美國，填國籍時，心念唔喺China又唔喺Britain，呢兩個國家我都冇份，硬住頭皮寫Chinese，種族者，唔係國籍，冇虛報呀。移民官一睇，冷冷地叉咗，改爲”Stateless”，無主孤魂也！咁佢又冇錯，的確無國家會認我。我話自己係乜公民都得，但人地啋我都傻。
自此，以後旅遊出入境，無論由美國去加拿大、由香港去台灣，我都自動填stateless，無謂霎氣。
而家當然反過來，中國claim咗我，我想再填stateless都唔得。至於BNO，唔喺我既game，你地玩啦！
英方高調宣布後日開跑後，中方宣布同日起反制：港人不得再用BNO在港出入境。亦即逼個的唔Like既港人，離港前要死死氣氣領番本特區護照先可上機。
的靚或者唔順氣，但當局話到底只係精神勝利。天要下雨，人要走佬，不由得他去也不行，還不如睇開的。
我既不鼓勵人移民，也不反對。如果真覺得頂唔順，擔心安危，或者唔想下一代咁樣成長，覺得非移民才安心，莫猶疑。但要爲收入大減做足心理準備。如果在港係月入10萬8萬既乜師，在外失卻licence，怕只能做part-time，搬運走dek，月入有3萬怕就唔錯。以此來換取政治安心、下一代的成長，覺得值得就好。
好在呢一代港人較九七個代有進步，對錢比較睇得開。此前更有流亡的靚忠告後來者，要爲移居地作出貢獻。金玉良言！人地接納你係可憐你，唔喺欠咗你！你要俾人地覺得有骨氣，值得敬重。馬死落地行，努力搵工，體力可以負擔既嘢都做。千祈唔好係人地屋企以香港鬥士爲業，伸大手板等救濟。
至於中國反制，從他們的角度理所當然，無足掛齒。
我此前已說過：你地唔好以爲我地走，帶走人才、資金，香港就會冧。大陸人口係香港將近200倍，裡面好多叻人。再看近月北水南下炒股可知，資金恐怕也多香港幾十倍。我估，人地早已定下「騰籠換鳥」大計：你地走，正好我派人、資落離接替，黑港轉藍港，一勞永逸。九七前怕你地走，而家南北實力已倒轉，不但不怕，甚至巴不得的反骨走，空出的位俾粉紅既新港人離填補。
短期內，限於牌照，唯一難填補的是律師和醫護。但相信上面也已有10年計劃，派人落離或南移以修讀這兩科，最終打入這兩行，有書記領導。
至於智能手機卡要實名制，說明中港制度迅速趨同。終極的趨同怕係要登記戶口，搬屋要通知差館。如果有人話已列入「14.5」，我唔敢唔信。
沒有留言:
張貼留言