200801六晚1號27°C 87%：Second strike

    昨晚傳來國安法second strike：通緝6個身在海外既後生，指其「裡通外國」。其中六四、佔鐘行頭既老牧師長居海外個仔（按：先前寫錯，謝蒙網友更正）成爲國安法下第一個被通緝的外籍港人。5個本土港青回家之路被封，怕只會豁出去，學半澤直樹「加倍奉還」。
    6人在港的親友相信仍可出外與其團聚。但或會有人check住，甚至被請飲latte。內網恢恢，冇疏冇漏。
    出手係國安的「本份」。意外的是先攘外而非先安內。試下港人點反應，然後再向在港的名士埋手？若此，誰是狀元、榜眼、探花，相信大家，包括佢地自己，心裏有數。到時西方不排除會向香港的經濟下手。
    而且，一拉開人，今後一年怕有十萬八萬港青到英、澳、台、加、美...留學、打工、移民...。但內地應已有準備，派精英南下接管要塞，拉近750萬人的藍黃比例。
    至於話唔承認BNO，最多係唔准在港既人用BNO上機，逼個的唔想做中國人既港人不得不申領特區護照作出境用（註：除非改例，否則港人入境用身份證，無須護照。至於話唔俾BNO人攞回鄉證，呢的人本來就唔會上去）。心理上委屈，但此外並無實效。