200515五晚28°C 86%：「沒有大日本，就沒有新中國」

   相隔4個月，今午再次得食favorite食肆既乾牛河。此前唔敢去，因爲係牌檔格，下午慣例七八成滿。今午撞上去，大多數枱都收起，只有10個8個食客。或因此，鑊氣特勁。或者過兩日再去試星米。

   5月份昨首次脫博。晚飯後本來要動筆，但心血來潮Goo到久違的英劇《Vera》第十季。一於睇咗先算。但睇完都瞓啦！
   好Like Brenda Blethyn演繹的女探長。阿嬸年紀，肥矮精練，偶有英式幽默，連帶令我想知多啲貧瘠冷濕既蘇格蘭。但做佢下屬唔容易。轉數快，一句dut過厘，隨時口啞啞。
   我獨Like刑偵劇。但只看擬真的查案，唔吼扮嘢、玩嘢的Who'dun'it、brain teaser，包括新版福爾摩斯。
   因此，起初專睇日劇，後來發覺英劇《Vera》《Shetland》（英國西北的小島，盛產羊毛）更好。嫌美劇、韓劇、陸劇扮嘢多過查案。
   但再睇落去，發覺北歐劇更勝。《Vera》的案子多屬個人問題，感情、錢銀、家族、鄰舍...。荷蘭、丹麥、瑞典、冰島劇多關乎社會，例如西歐前幾年最關注的難民...：東歐、中東、非洲的窮人偷渡去搵食，做II過程中被黑幫魚肉甚至殺害。我都踎過美國唐人街，可以想象箇中的辛酸。
    至今睇過最勁既係丹麥-瑞典合拍的《The Bridge》(邊橋謎案)、冰島的《Trapped》(絕境/困獸之鬥)。呢的唔夠千萬人既小國，製作叻過人口幾十倍的美韓中。國不在大，有文則靈？

   講番大事。昨晚睇到特朗普發出至今對華最嚴厲的警告：不惜斷絕關係。但只係一句話，冇substance。憑常理，冇乜可能做到。斷交，有必要？中斷貿易，美國農民點開飯？截停移民？但唔俾已入籍的大陸人接家人團聚，怕會告到最高法院。唔收陸生或有可能，但美國大學肯定媽媽聲，因爲科研好靠佢地。
   同樣昨晚，就日前DSE歷史科必答題要考生作文：是否同意「1900-45年(博主註：45年係日本戰敗投降那年)間，日本為中國帶來的利多於弊」，教局認爲有損民族尊嚴。今午更宣佈取消呢條試題，亦即無論考生點答都唔計分。
   出題者呢次顯然過咗火位。今午在牌檔，鄰枱幾位男客就語帶諷刺。聽口氣唔似藍絲。
   但反對的人個個都好認真咁講呢單嘢。只怕捉錯用神。
   我亂估：呢場係出題、審題有默契既「光復革命」，特登用歪理来踩官方底線，逼其「打壓」學術、思想自由，激发五眼歐洲帶領全球「反華」。北京唔惡唔得，但越惡反彈就越強。
   要爲呢條試題辯解好簡單：考生只要駁倒呢個歪理，唔係就維護咗民族尊嚴囉？出呢條題有乜嘢問題者？
   講句笑，如果我今次報考，第一句就答：「沒有大日本，就沒有新中國」，調寄我兒時在廣州唱的《沒有共產黨，就沒有新中國》。毛主席當年言下之意：日軍侵華搞大共產黨，利其打敗國民黨，建立新中國。啱嗮出題原意啦，仲唔攞梗5*？