190406六Day29午後：老母如假包換的親生仔

清明翌日，連續第二日見陽光。
病房繼續缺人，特別係阿姐，房友午飯落床上床都要勞煩姑娘。阿姐和姑娘都好辛苦。
見阿姐來斟水，問仲未收工？姐話，收三點。我豎起拇指。點知阿姐笑笑口 ，下一句係：你十一點又見我架啦！
放八個鐘，扣起來回醫院既時間，得幾個鐘休息、做自己既嘢。
房友都好開心有你幫手，但又唔想你咁辛苦。上天保佑你，阿姐！
有同房看似出院。說看似，因為未見有人來接，話唔定是轉院。
午飯後來抽血。入院至今被限水intake，因為血鈉偏低。老母的遺傳。
我大部分已知的生理traits都來自老母，在富裕社會裡是另類：食極唔肥，低血壓、輕微貧血... 。故唔憂三高。但反過來有暈低、腦缺氧的風險，腦溢血的反面。
這亦是長者常見的問題。
月前去安老院探老母。她第一次對我同妹講，字眼不記得了，但意思很清楚：咁長命做乜？早的去，唔使你地咁辛苦。
我其實唔辛苦。辛苦既係我妹，每天下午去院舍兩個鐘，幫忙照顧，確保安全。包括前十幾年在家照顧，加埋應有15年，期間連深圳都去唔到。
先父八十年代初兩次中風，在家半癱瘓咗幾年。我不在港。當時住唔起安老院。母與妹照顧，捱得好辛苦。而家輪到96歲的老母，總算入咗安老院，進咗一大步。
希望到我晚年能突然離開，避免家人受苦。
《楢山節考》看似赤貧深山古時的殘酷。但想深一層，今天的富裕社會就不需要？
May God have mercy.