180624日午後31°C 75%：世盃點滴

   旺主辦國：開賽以來無負聞，未聞恐襲騷動、安檢過嚴、人權爭議。但不排除有人被帶去西伯利亞旅遊。賽前被力踩的俄羅斯更連贏兩場出線，恍如賀普京連任。
   旺斯拉夫：西歐足球素來高東歐一皮，似乎民主勝威權。但斯拉夫民族今屆抽得好籤，俄羅斯、克羅地亞提早出線，塞爾維亞也有機。大帝飲得杯落。
   法國着數：德國、巴西欠態，雙牙相殘，強隊裡法國睇好。
   歐洲壓倒美洲 ：拉美或只有烏拉圭、墨西哥、巴西出線。墨西哥狀態好過巴西，抗歐怕要靠佢。

   中俄撐起場邊天：場邊四周既中文奪目過場上的C朗，中國隊有份打都冇咁威。我這才知：純甄係奶唔係酒。俄羅斯的Gasprom在場邊與中資相呼應，或非巧合。

   丹麥20號Yurary紥個小髻，看似巴西名宿朗拿甸奴。

   收視幸得救：巴西補時贏哥斯達黎加，德國補時反勝瑞典。兩強不但保持出線機會，也挽救了餘下賽事的收視。

   厲害了，比利時：決賽週至今以昨天比利時5：2贏突尼斯最好睇。比利時水銀瀉地，如早期荷蘭。盧卡古好似足球既Dwayne Johnson。突尼斯也不差，無奈對手強。

   黑仔：比利時21號Batshuayi的兩個隊友各入突尼斯兩球。但自己埋門，唔係射正門將既手，就係門前撞柱，睇佢係鏡頭前惱到爆。好在完場前執番粒。

   最冇癮既觀眾：開幕對主辦國俄羅斯，沙特元首應邀與普京排排坐睇波。點知淨吞5蛋，呢個半鐘都幾難捱。何況失第一球後，獲普京伸手邀請相握。

    沙特接著輸埋第二場出局。沙特人相信很要面，成個球壇怕都要問責。