180617日午30°C 64%：美斯果然係命

   剛連睇兩場。
   頭場法國技高一籌，但被澳洲憑身型體力鬥志幾乎拉平。雙方各入一個十二碼，最後勝負睇運。法國最高身價的Pogba尾段大腳抽射撞橫樑落地彈出，影像確定已過白界。法國憑此險勝2:1，但表現缺冠軍相。
   澳洲06年由只有蚊型島國的大洋區轉入亞洲區，記憶中每屆都能入決賽週，與東亞兩強的韓日不相伯仲。在決賽週雖然陪跑，但對歐洲、南美輸得好睇。考慮到其偏處地球一角，對外交流不易，國民愛欖球和戶外活動，足球又不像中東油國靠請槍，有此成績值得自豪。
   這隊澳洲還有一奇景：隊長Jedinak既巨鬍似虔誠的伊斯蘭，又似紐約既Hasidic Jew。對手拉唔住衫時，萬一掹鬚都幾痛苦。   

   唔敢唔信，美斯爲國出征二奶命。
   昨帶領阿根廷首戰，以爲可用首次入決賽週的冰島祭旗，點知俾技術普通但高大強悍的維京人用4411加拉扯推撞抵消技術優勢。唯一贏面的十二碼也被隊長大人係咁一腳but埋去被擋回，成爲決賽週兩日以來，唯一宴客的十二碼。
   美斯衰咗後，博命想贖罪。但俾對方幾個人死纏，扭極都擺唔甩，勉強起腳又冇運。
   埋單1:1，人口只及中國一個鎮的冰島，在世盃亞軍身上奪得決賽週的第一分。
   其實不止阿根廷，巴西亦然，南美勁旅往往被本身最強的腳法所累。慣拖波，易在西北歐的高速高壓下失拖。推拉撞雖然超技術，但未至傷人，任你罰，耐佢唔何。
   南美人技術要高一皮，才可望抵消西北歐人的高快悍優勢，否則就劣幣驅逐良幣。   
   睇美斯在場上的無奈，有時係幾心噏。
   但冰島隊最有趣的是：隊裏23人，有22個姓-son（港譯臣）。-son的字尾顯來自男人大嗮的古維京。生仔叫Johann Iammyfathersson冇問題；但生女叫Mary Iammyfathersson?
   這方面，斯拉夫民族反較平等。生仔字尾用-v(夫)，生女用-va(娃)。女仔唔使硬跟男仔姓。冇人唔知網球場上既Sharapova係女人。
   相對沙特，冰島隊同樣值得注意的是，清一色Viking look金髮白人，不靠外援。當然，冰島雪多過人，冰甲難覓觀衆，過江龍唔吼。但10萬本土人有此成就，絕不簡單。下次收起超技術就好。