180623六夜26°C 93%：巴西幸保出線機會

   更正：蒙網友指正，逼和阿根廷的是冰島而非瑞士。
   隨後的新聞多少證實，阿根廷過去兩仗的確鬧情緒。聞說球員要換帥，但足協不允，理由是此前已換過兩個，俾唔起分手費。美斯等7名主將打算世盃後退出國家隊。

   對我來說，除了足球，阿根廷最出名的是牛肉、 民粹女王Eva Peron(貝隆夫人)和Andrew Lloyd Webber的名曲"Don't Cry for me Argentina"。但作爲南美的富國和唯一的白人大國，過去這30多年，不止一次宣佈無力償還外債，管治上更似failed state。

   足球好講運，爆冷預咗。但同日三場波都峯迴路轉，難買過3T。世盃昨日做到了。
   頭場巴西第二仗，適逢海外親人回來，家族聚餐，飯後首次全家睇波。巴西上場被逼和，今場對哥斯達黎加發奮。但強攻90分鐘，次次都射正龍門企位。對手也有威脅，但同樣唔入。但一補時就如電影轉快鏡，巴西立即入波。此旺彼衰下，尼馬在吹雞前執雞開齋，補償上場俾人睇住離食既無奈。
   巴西贏波合理，維持出線希望對世盃也好，否則億萬擁躉會好冇癮。
   但哥斯攻守都不差，90分鐘都頂咗，就衰最後6分鐘，亦命也。
   二場尼日利亞vs冰島，我睇咗上半場，發覺冰島攻勢凌厲，射罰球亦近磅，絕非高大衰，惜無所獲。下半場反比尼日利亞攻破，氣勢逆轉，終再輸多粒。可惜了，下屆加油。
   尾場塞爾維亞贏瑞士，我冇追。看入球片段，同樣是下半場反勝。
   但呢場既焦點唔係「波」而係國恨。90年代南斯拉夫隨蘇聯集團解體，按民族、宗教背景，分成7/8塊。其中塞爾維亞在南國的位置相當於中國京津冀，反對分家，對一些地區動武，過程中被指犯下種族滅絕罪。
  其中以阿爾巴尼亞族裔爲主的科索沃受害最深，故最憎塞爾維亞。08年宣布脫離塞爾維亞獨立，但塞爾維亞不承認。
  南國解體導致的內戰中，不少居民逃往西歐。昨日巧在瑞士入的2球分別來自2位阿爾巴尼亞裔球員。2人入球後，都以象徵阿國國旗的雙鷹手勢慶祝。事後梗係唔認係政治啦。