180614四27°C 83%近午：真人最怕「虛擬」？

   美國投行Citi(花旗)說，佔40%人力的營運科技部未來5年或用機械人取代1萬名員工；人力主要在銷售、研究。德意志銀行說，以往「人像機械那樣工作，明天則機械像人那樣工作。」
   自從八達通取代收銀、點數、解款，我就說大把手工會被電腦取代。新一代難晉升，問電腦啦！
   幾年前Google News用電腦代人蒐、編新聞，編輯記者死都話質量不如人。今天再也冇人講。
   今報載〈AI拍科幻片 拼接舊戲加「換臉」48小時完成〉，但對白語無倫次。處女作確得啖笑，但AI的學力非人可比，三個round後話唔定James Cameron都驚。讀緊編劇要諗諗，現職準備再培訓！
   《Economist》也說，醫學界請AI代「睇片」。先輸入萬計的人體掃描片，教AI軟件邊的陰影係腫脹、損傷、變異、腫瘤...。AI頓悟後。接過真病例，睇片快過準過醫生。
   下一步會否係PC/Mac鏡頭前加個便攜的掃描器，人人可在家做檢查？手機過數後，開電腦解衣，用鏡頭對準有關部位，讓網絡另一頭的醫院拍攝。AI睇片後，一個鐘即回傳報告：圈出影像上有異的部位，請閣下依時回來抽血、做內窺鏡、切片。醫生不致失業，但肯定「輕鬆」得多。
   有人會大譁：解衣後，點知唔會被人係另一頭hack，網上直播我既「重點」？係架，「借錢梗要還」，驚就唔好玩。