2018年6月22日 星期五

180622五清晨28°C 91%:I don't cry for you, Argentina

   賽前就估阿根廷第二仗有可能輸,但冇料到咁肉酸,僅次於巴西輸德國1:7的世紀恥辱,似已超越足球,而是南美人的個性。
   事前就不睇好,因爲決賽週見慣克羅地亞紅白相間的棋盤球衣,感覺上是巴爾幹半島最強,略高於本屆同樣入圍的鄰居塞爾維亞。
   相比之下,看阿根廷上仗俾茅躉瑞士(更正:寫錯,應該是冰島)逼和。連美斯在內,全隊一臉倖色。入唔到波頓地仍顯出拼搏精神,會繼續鬥。但倖色是晦氣,更似怨天尤人,隱含着放棄。
   本來唔打算睇呢場。但半夜熱醒,剛好下半場開波。但睇幾眼就覺唔妥:當時仲係0:0,但阿根廷後防三人一排,中場一有波就彼此橫傳,甚至後傳給門將,好似贏緊。
   最終就咁輸第一個波:後防後傳,門將本欲趁對方衝前,大腳踢去前場,點知but唔正,球在幾米外作拋物線下墜。對方一聲唔該,大腳抽入。
   阿根廷上仗只得一分,第二仗下半場又落後,但後防三人仍繼續橫傳回傳。反之,對方中場一截到波就死走,兩三下就逼入禁區。阿根廷回防慢,經常三對三。
   對方第二球射得靚。時下半場已過半,看阿根廷各人的神情、步姿,顯已放棄。第三球基本上亦屬後防橫傳之罪。
   看來,阿根廷一如上次巴西輸1:7,衰在情緒,幫唔落。
   兩仗得一分,加上全隊負能量,出線希望怕唔夠一成。
   香港到處是美斯(內地譯梅斯)中資廣告。內地球迷若愛他,廣告怕唔敢換成呢次兩仗入4球領先射手榜的C朗!美斯變霉斯連累内地,此亦全球化效應。
   由此想到一種「偏見」。美斯少時發育不良,在運動員裏又矮又細。爲人Like除了扭射有神,怕也是覺得kawaii,與C朗的硬朗剛好相反。若此,現在鬚、大紋身,與身型很不協調。幫會甚至拉登look符合他的個性?

1 則留言:

匿名 提到...

上一輪阿根廷對冰島,對瑞士的是巴西。崔公之前也曾撰文稱讚冰島。