第四波果然勁：今日確診43，本地佔36，13宗無厘頭。聽日可能仲勁，因爲今日初步確診>60。跳舞羣組兩日累計已32單。呢一波高潮一日百單唔咁話唔可能。
與此同時，發達地區似乎一齊勁爆，西歐不特已，連日本都創新高。
呢場仗怕真喺要等過半人打咗疫苗之後先至完，仲要捱大半年。
疫苗現正搶閘：美國1.大廠Pfizer+德國BioNTech；2.Moderna兩種已向美歐申請緊急應用，公衆信心應該也領先。
中國當然不能執輸，不過初期怕只能送去發展中地區。港澳建制也會請纓，但香港怕有一半人會靜觀其變。
俄羅斯也不甘後人，普京女兒早已接種。
牛津研發的一種據說對長者特好。可惜我冇BNO，否則一定爭做guinea pig。不過冇問題，上主自有安排。
若關鍵在疫苗，按普及先後，相信依次係美歐、俄羅斯（人少，可以食自己）、東亞（靠美歐和中國供應）。若此，香港怕至少要明年年中先可以解除警報，九月正常開學。
日前傾起，我唔信東奧明夏開得成。即使唔俾觀衆入場，運動員也顧忌。除咗個別項目有的國家係國技（例如肯尼亞的馬拉松），獎牌hopefuls大都來自富國（包括美、歐、澳、日）、中、俄。但疫情偏偏專蝦富國：國家越自由，國民越富有，活動範圍越大，播疫風險越高。頂尖運動員萬一出賽染疫，即使復原，也可能難以回復巔峯狀態，問獎無望。莫說摔跤、柔道等貼身競技，即使拳擊、劍擊，長跑…，都隨時俾對手的口氣噴到。唔通帶住頭盔比賽乜？
所以，唔使念啦，繼續養性啦！睇今午我地邱局長見記者就知，旅遊氣泡者，泡湯旅遊也！
役所廣司再有型，換咗今日，都唔敢再拍《談談情，跳跳舞》。貼面跳探戈，等住入ICU啦！
沒有留言:
張貼留言