180826日凌晨29°C 78%：有得震，冇得瞓

   不記得何時起不再戴錶。但與不再看報「紙」，應大致同時，或都是退休後。若此也就有15年。
   「紙」報應不會再看。香港冇地震，除非外出遇事，冇網、冇電，否則冇理由要再浪費紙、弄髒手才能知道世上有乜事。
   但手錶還是保留了一個，作爲先父唯一的遺物。將近50年前在港買的機械Omega，寄到美國給我。當時好像要600元，折合今天過萬。回港後塞在角落裏，怕有30年未抹油。近年家人拿來戴，走動如儀，雖然每日仍快兩三分鐘。瑞士《厲害》而不自詡，這就是內涵。
   但日前終又再戴「錶」，連沖涼都唔除。有朋友爲了游水，開始戴電子手環。聽落幾有用。
   手環二百零蚊，用藍牙接收手機的訊息。每逢手機有來電、WhatsApp...，又或set定時間，手環會震，顯示來電/訊者的身份，讓你決定是否開機check。
   這類手環其實以運動為賣點：除了戴住游水、測心率，可話你知行咗幾多步，夠唔夠每日8,000，又今晚瞓咗幾個鐘，淺睡和深睡各佔多少；坐得耐會震，提醒你起身行。
   戴了一週十日，覺得OK。少咗因爲行街時聽唔到電話俾人鬧，也無須不時開背囊、搲褲袋攞手機來check時間、訊息。WhatsApp裏的大group時來雜音。手環話呢的羣組來料，一於pass。
   我生性機械，好聽手環話。日常慣咗想做嘢，一坐幾個鐘，真係驚中風。而家手環一震話坐得耐，我就起身，行勻斗室有空地的角度，兜它十個八個圈。
   後來又發現，手環可預設時間和事項，到時震一震，叫我食藥、煮飯、沖涼、出街...，有助失憶的老人。 
  我戴的手環是大陸貨，賣二百鬆的蚊。雖然叉一次夠用一周，但有4大局限：
  1. 只能接收手機來訊，冇鍵盤，不能回覆手機。手機離開藍牙範圍，手環只是電子錶，有時間，可響鬧；
  2. 屏幕細，只能展示來WhatsApp的身份加三兩個字內文，睇相睇片仍要開手機；
  3. 不能俾錢，唔係八達通；
  4. 似乎只識中文，用語偏向普通話，本土派同英文用戶唔啱。
  但同類的外國手環多的是。再高一級當然是Apple錶，應可對應上述4種局限。