180802四近午晴31°C74%：問君能有幾多愁，買咗笨金賣咗樓？

   政府首推長者年金，下週三截止。我大半年前就聽說。有人問有冇買。
   政府被鬧搵笨唔奇。年金係俾弱勢人士保本既。你若精壯、中產，梗係唔吼。正所謂買匯豐一年都有5%，交百萬俾政府月收5千零，唔夠交差餉、地租、管理費，再過幾年扣埋通脹得個吉！
   完全正確!但意大利史家Croce話齋，只看眼前。鬧個時唔會諗，晚年萬一無力理財，仲計唔計較得咁多。我估年金主要俾4種人：
   1. 基層長者，只有幾十萬，家有親人。怕晚年老眼昏花被人謀。社會新聞見得多。
   2. 不善投資、懶睇股市，又或怕晚年失智臥牀，揸住匯豐都唔賣得；
   3. 家裏「大使」(大花筒)唔計數。退休頭十年開心購物旅遊、執靚個單位。晚年先知使過龍，加上體弱要請人照顧，捉襟見肘。
   4. 仔女孝順，一次過夾一百幾十萬，讓阿爸阿媽晚年有固定的月入，放心生活。年金唔計入資產，父母可照住公屋、攞長生津。
   我屬於不善投資，貼錢買安心個類。

   但你如果進取善理財，以下的退休資產專家建議，或可供參考：
   1. 應急資金 + 2. 人身風險儲備
   3. 平穩收益組合（如年金）
   4. 長遠進取給合（如股票）
   留起應急資金及人身風險儲蓄後，其餘資金可運用100法則，即100減去年齡得出的數字，作為平穩和進取投資的百分比。
   例如54歲，即100-54=46，46%作進取投資，其餘作平穩投資。