200129三初五晚14°C 53%：林鄭凡事慢拍，因爲...

   武肺昨初四繼續急升，但升3成已遠低於前日初三的5成。
   如果今初五、明初六增幅繼續緩和，初七的衆人生日，大家或者可以一齊慶祝下。
   與17年前的沙士相比，武肺傳染力較強，幸而殺傷力較弱。因此，至昨日爲止案例已多過沙士，但死亡率低得多。
   直接的後果是：case多，做死負責追蹤接觸者、近距離治療患者的醫護人員。但對患者和家人來說，除了70/80歲的長者和長期病患，一般不致危及生命。
   當然，這只是目前這一刻所知。但適者生存，病毒會變種來趨吉避凶。萬一攻擊性加強，甚至培養出抗藥性，咁就大劑。
   因此，一刻也不能鬆懈。

   今日的話題無疑係排口罩。但真正有significance既係：沉寂了個多月的勇武，因爲政府唔肯封關而再次出動。
   唔怕講，如果反修例有七成市民同情勇武，而家唔封關，疫情一旦擴散，尤其證實源頭八九成係南來客，我敢話：到時至少八成市民會支持勇武。砸政府、打官員，市民唔單止叫好，更會暗中幫佢地，唔俾「暴警」郁。
   同樣地，七八成市民會諒解甚至同情醫護罷工。
   到時，除了可能一成既深藍，人人都恨不得林鄭PK。仲點管治？
   這兩天明白了。我起初說林鄭凡事慢幾拍，因爲限於經貿，唔敢得罪內地30個省市既諸侯。呢班人多數係中央委員，個別甚至係政治局委員。正如此前的上海書記韓正，將來甚至有人會升常委。
   但後來看澳門呢次大刀闊斧，處處叻過我地，甚至派警察入酒店拉疫區客，我才想起：
   林鄭唔敢爲中國「先」，係忌政治。
   澳門封關，內地冇人會鬧佢反骨。因爲一向對中央言聽計從。故可確信，封關純爲「免疫」。否則淪爲疫埠，賭場一年半載都無法重開，內地玩家仲冇癮。
   但香港相反。版𡃁啱啱先鬥咗大陸大半年，要自主甚至獨立。林鄭要與其劃清界線。搶先封關，怕俾上頭懷疑與班𡃁同路，至少間接「證明」班𡃁反中有理。因此，處處等上頭開聲，變成跟尾狗。
   當然，這只是我亂噏，並冇根據。