2020年1月18日 星期六

200118 六午20°C 66%:唔怕講,長者搭車2蚊我...

    昨例行做義工。將近5個月了,首次試做帶腦力既,但好用眼。
    我係廣州最後兩年讀小六初一。夜晚無聊,同街對面擺攤既阿叔租小說睇。當時既室內仍屬"黑暗世界",睇嗮四大名著、三言兩拍、施公彭公、封神榜...案,所有睇得明既古典小說(因爲唔識古文)後,來港後就要戴銀鏡。盛年已達千度。退休後做咗白內障,眼力仍差過同齡人,度數更有所加深。但冇法啦!希望最後幾年唔至於要靠AI(而家港人既AI係"阿姐")。
   
    做完義工,回程坐快巴經東廊西行,一過銅鑼灣就塞。而且係全程塞,唔係某點有交通意外個種。當時仲未放工。本來要去中環,但由銅鑼灣ngut到金鐘可能已用咗15分鐘,馬死落地行。
    但係金鐘飲完下午茶,繼續塞。車龍、人龍...到處都係龍。的士站更空窗。
    此前係快巴上就諗:係唔係金鐘中環有人"和我suck(連登仔女個腦咁快,肯定有人過將s寫成f,只不過待時機成熟)"。因爲昨日較早時間新聞話,週日既全球反共遊行申請被警方否決。但睇港台、AD即時又晤見話有人上街。我冇職業司機既Apps,至今都唔知點解。

    林鄭日前宣佈既"惠長"措施,唔怕講,我冇份。2蚊搭車早就有,長生津、資助房屋冇資格。我係呢個經濟階層和年齡段,最實惠既怕係:
    1. 趁仍行得郁得、未癡呆,想有的嘢做,可用到自己腦力、教育既part-time。做的後生唔想做既嘢。等佢地去'活出自己',旅遊、創意、...。
    2. 最後離開時有適當既歸宿。我希望器官有用就捐嗮佢,然後自己化灰落海,唔使屋企人煩。

   至於呢次最轟動既2蚊雞惠及60+,冇人唔歡迎,而只會引起向下cut-off既問題。但唔怕講,我雖然係既得利益着,但係唔贊成既。
   我絕對贊成優待長者。但無論原來幾蚊,劃一減到2蚊過嗮火。
   半價對大多數長者已夠好。長生津、綜援...長者可每月加一筆幾百元既車費津貼。
   減到2蚊過火,因爲2蚊係死數,車費會:
   1.隨里程上升,差距係幾倍。短程巴士幾蚊雞,2蚊合理;但最長程既巴士、鐵路、小輪要20蚊,亦係2蚊。政府要貼差價俾公交公司,擺明荒謬;
   2.隨通脹亦即歲月而增加。政策初時2蚊,10/20年後,大巴由中環去元朗、屯門可能加到30蚊,我仲係2蚊,政府俾巴士公司既錢就要由而家可能18蚊加到28蚊。試想再過10年...,當然唔係可持續既發展。

   當初想出2蚊個官,絕對白癡!唔知係唔係學內地。
   但內地做嘢,素來只睇自己既檔口同埋眼前三五年:要快、要大、要豪,有政績博升官,有錢落袋,懶理長遠後果。所以內地發得咁快,但後遺症咁大。

1 則留言:

匿名 提到...

「只睇自己既檔口同埋眼前三五年」:民主國家可能更嚴重 (Donald Trump 就係人辦),呢個亦都係同民粹主義相輔相成嘅事。

香港跳得出呢個框框,某程度上係因為要同中共作長期對抗。