200109四晚20°C 80%：30年來最戲劇性既國際危機

    伊朗二號人物被炸死，百萬人上街，與特朗普不共戴天。全球由國際舞台到金融市場打定輸數，以爲地區戰爭、恐怖襲擊難逃，美國佬有排驚。點知24小時內，出現近30年來國際上最戲劇性的轉圜，僅次於柏林圍牆倒塌、戈爾巴喬夫宣佈蘇聯解體...。
    伊朗雖一如所料，高調轟炸伊拉克的美軍基地，聲稱殺死80名美軍。但西媒幾同一時間說：伊朗轟炸時，「刻意」避開基地內有人的場所，換言之，只炸無人既倉庫之類。
    反之，特朗普也隨即宣佈：無美軍傷亡。西媒說，伊朗來襲前幾小時，美方就已截取其通訊，得悉來襲的時間、選址、火力，及早疏散了基地的軍人。
    說白了，伊朗方面唔想或唔敢同特朗普離真既。所謂轟炸純屬做騷，爲二號人物之死，對國民和己方的伊斯蘭什葉派信衆，作點交差，紓緩民憤。
    與此同時，本來鷹到痹既特朗普也轉性：伊朗來襲後，只提繼續制裁，不提武力。言下之意，己方既無傷亡，無意反擊報復。
    一場以爲走唔甩既兇險戰爭，在24小時內，因爲雙方領袖，尤其係伊朗精神領袖哈梅內伊忍住，化險爲夷，派彩可比六合彩。大大話話，今年諾貝爾和平獎不妨諗諗。呢次危機既始作俑者特朗普或者就算了。但伊朗幾十年來都俾人militant既印象，哈梅內伊有此膽色、量度、政治技巧，怕冇人估到。希望伊朗人平復落離，從長計議。
    特朗普呢次亦都算收手：伊朗來襲後，佢話明唔想打。唔知係唔係終於醒水，自己日前選擇殺對方二號人物，過嗮火位，不利競選連任？
    依家冇事就好。希望雙方默契設個冷靜期，回過頭去，先做好自己，爲國民多謀的福祉，與外國對手的角力來日方長，大可放慢的。
    但伊朗危機迅速解除，特朗普得以專心打貿戰，借來競選連任，對中國不利。但看世界大局，美伊關係緩和是好事。無悔！