200109四晴19°C 75%：木村新劇警方最啱睇

   擒日又懒咗。晚饭后本欲留幾個字，但木村新劇《教場》上，睇完一集已近午夜。
   算係有趣，原來並非單sell警察學堂既魔鬼教官，而係話教官偵破學員間有違校規的懸疑劇。比木村剛上完的《東京大飯店》差得远，但在年來的日劇低潮中，總算睇得落。
   但更有趣既係，最需要睇既港人係警察。警方應播俾所有屬員睇。戲裏既課程，港警照理入警校時都學過。但過去7個月（以6.9起計）留低無限咁多痛腳，成爲港人反修例的動力。750萬人裏最需要再培訓既，正係3萬警察。
   冇錯，一班忍者有組織，唔排除曾受外人培訓。但警方更有組織、制度、培訓、資源。上陣收入唔錯。唔怕講，我估與上面對口部門也有交流甚至「交媾」（啱既：地方上維持治安既武裝，點能夠唔同統籌全國既對口部門合拍？）。咁都俾人玩死，認真要upgrade。
   
    今朝未天光就紮醒，瞓唔番。網上見公園開6點、快餐開6點半，索性未天光就去晨運，然後嘆通粉腸蛋既港式早餐。
    果然，舊時話齋，「倒塔」咁早既公園，幾乎由長者包辦。但肯做運動，至少係想自顧、少病痛、減少對家人、社會既負擔，值得尊敬。
    係公園時唔覺。但食完早餐近8點，密雲翻風，快餐店近門收銀處既阿姐嗌凍要加衫。我亦急急歸家。但離到10點，又陽光普照。希望今日日間都係咁。

    大前日又接到在美香港同窗既訃聞。也是輾轉傳來的，沒說離世的日期和原因。讀文科的好好先生。同校時，M君在大學圖書館的遠東部，亦即中日韓文書庫part-time，我則幾乎每天下午去圖書館，看與本行無關的書報，見他多過見自己既論文導師。
    過去這30年，同窗每次回港，多數會約埋食餐飯。香港回歸後，一度回港服務母校。但住慣美國，生活上有點隔閡，最後仍以美國爲歸宿。這是我這代人的無奈。我只因爲改了行，靠中文開飯，加上家庭結構，才無反顧地回歸。