200612五晚30°C 76%一號：《國歌法》生效，政治大日子

   連日陰雨後，昨起「艷陽天」。但預料明週六再次陰雨，後天更可能打風。
   昨7點晨運，首次曬到睜唔開眼，熱力逼人。傍晚看新聞，午後33.9度入夏最高。
   今晨超早紮醒，外出行長途。午飯後見窗外烈焰，特登出去曬。果然好'慶'。但我怕冷唔怕熱，行咗十分鐘身慶但冇汗，反而覺得難得曬下，有益身體。原來，今午35度，一年難得一次。不過，而家既話題係反國安法，天氣靠邊站--除非掛八號！
   讀中學時，每日番住處食晏。行15分鐘去搭巴士，沿途有一半冇遮擋。回到住處扒完飯趕返學，又要捱好長既冇遮路。熱天長達半年，下午踏入課室，有時頭頂慶到好似吹波。好在當時冇冷氣，否則實好易感冒。少時唔怕曬，而家老咗就更唔怕，至少好過凍。加上出汗少、飲水多，唔易中暑。因此，我愛夏天！
   今日旺政治：《國歌法》生效。與此同時，教育、公務員、港台...齊聲收緊。加上社運與政府「開打」一週年，銅鑼灣、旺角都有人上街紀念。警方自然也兵來將擋。
   公務員薪高糧準，永冇炒魷，退休仲有長糧，好過90+%既打工人。唔准公開與政府唱對台，在所難免。但你內心點，佢有乜符者？
   港台幾十年來，一直想做BBC。但港府既性質與唐寧街差天同地，港台也就唔可能係BBC。只不過社會風氣本土，支持港台食硬皇糧，但「監篤」皇上。但現實中就如公務員既問題，邊有半斤八兩咁理想。
   真正令人憂慮既係教育。教師同學生普遍唔Like上邊同港府，師生之間絕對親過教師同政府。而家逼教師爲飯碗壓班學生，既不可能也不道德。對着校服既學生更不可能用警力。硬壓只會官逼民反，予西方口實。
   同日最能說明大勢既係：愛國「皇仁」的學生當街拉人鏈，爲一位唔禁止同學唱《榮光》既老師不獲續約發聲。愛國精英都公開造反，其他學生不問可知。