191219四深夜19°C 75%：大時代，憂心死

   晨運了幾個月，今首見霧鎖香港。雖與電影裏的霧中倫敦仍差得遠，更冇輪船鳴笛，但總算有點意境。
   不知是否因爲霧，晤見每天此時在附近停靠的黃冠白鸚鵡。直到我即將離去，才有一隻飛過來。大霧會否影響它們覓食？
   白鸚鵡好睇唔好聽：聲「拆」得個嘈字，但立在柱子上很威。有三隻常伴我左右，其中兩隻企得較近。怕係另一對「走」咗一隻。動物或不像人咁易續絃，人可否幫手？

   縱退休已久，也脫不了幾十年的本行關係。熟人偶爾碰面，不免呻一輪近月的情勢。家裏若有後生，上一代首先要保護佢地，怕受傷、惹官非，根本談不上了解、說服。
   感覺上，後生90%偏黃，能保持和理非，父母就已安心。萬一週末晚唔見人，父母擔心死。終於接到消息，趕去接「放學」。唔好彩既話，自己都可能領嘢。
   至於家人分黃藍，在所難免。20幾年前陳水扁首次當選總統前夕，台灣既八卦就係邊對夫婦爲藍綠而離婚。今日既香港，在家一人講少句，唔離家出走，就算係咁。大時代，更要忍。
    監警會既外國顧問全體劈炮，令絕大多數人更深信：官方既檢討係廢既。昨連親建制既民調組織都被quoted：〈逾半港人不滿法治 認同違法達義倍增〉。這絕對係災難。一個社會若有七八成人唔接受政府，仲點管轄？
    暴力雖大爲收斂，但抗爭死死咬住。如今看，聖誕、新年甚至一個月後既過年，都會繼續攬炒。唔怕講，老人冇乜社會活動。你咪炒囉，我食麪包、公仔麪都過得去。但對少青中，再拖落去會浪費一代甚至兩代人。
   周前，有久居海外既港友睇唔過眼，萬里外來電。應屬傳統既付費長途電話，唔係WhatsApp一類既free lunch。友人覺得當局應開明的，先解開目前的死結。但以我主觀看，中共早已把港局提升到國安、主權層次，非特區所能決定。
    中共頂峯今天莫說冇「趙紫陽」，即便有，也做不出什麼。趙當年的自由化改革，說白了是戊戌維新翻版：靠一批書呆來開放中國。但適逢列根和戴卓爾的右翼自由主義主宰全球，針對封閉的社會，主要的藥方是shock therapy：一夜間撤除對市場的統制。短期會亂一陣，但咬緊牙關頂過去，自由市場就會出現，自此與全球經濟接軌，就好似女人生仔：只要頂過去，就會出個好仔。在1989年，列根和戴卓爾氣勢磅礴。痛恨文革的中國書呆對這種美式naivete信到十足，可以理解。
    趙紫陽是好人，但腦力有限。淪爲六四光緒後，以烈士身份成爲中國自由派當然的火炬。但相信港人還記得：中英就港接近達成協議時，有港記以質疑的口氣問佢。佢反問：（中國收回香港，）你們（港人）怕什麼？Anybody in Hong Kong with the right mind都知道答案，唯獨最精通馬列的總書記大人唔明。我相信佢唔係扮曚。
    回到正題，而家習近平超強勢，8,000萬黨員裏即使有個別「趙紫陽」，也論唔到佢出聲。唔怕講，我地既曾鈺成就係港版「趙紫陽」。睇傳統左派憎佢憎過黃之鋒就知，佢肯定係資深黨員，只不過係港人，所以冇消失。
    再講，以今日香港年輕人既行爲，客觀上港局也確已上升到主權層次。有唔少（我估至少有四成）港青想獨立。只不過經過呢半年既抗爭，逐漸明白港獨近乎死罪，近月唔敢再公開嗌或燒國旗...。但我敢話，內心絕對咁諗。只不過老一輩海外港人幾十年慣咗只睇NYT、CNN...，才會覺得港青其實只係要自由、民主。睇番下港媒，尤其係連登就知，對佢地來說，只要與中共同屬一國，自由就會逐漸被侵蝕，民主就更無望。
    咁講並非同意呢種睇法，而只是講出佢地既思維。信唔信由你。