221222四20°C 30%：年終感恩，備戰來年

    美國人崇尚開放，以往興每年年終通函各地友人，附帶家人合照，講述一家年來的大事，並賀聖誕新年。北美有華人入鄉隨俗，我每年總會收到。但很抱歉，無以為報。
    自問生活平淡，只求冇穿冇爛，美國話齋No news is good news。過去一年如果乏善可陳悶死你，大件事的話則又嚇死你。不如不說。

    我再過幾年就進入上一代美/英國人笑說的：每朝拿起報紙，先揭到底版內頁的訃聞，看誰又走了，估跟住係邊個（包括自己）。
    我母親明年大概就100歲（說大概，因為唔敢話佢當年上報既出生年份有幾準），入住安老院將近10年。一生人只好打牌。我大約4-5歲，就帶埋我去朋友家開枱。坐喺佢身邊，讓我五歲就學識呢門當時最重要既社交技巧，甚至識得提醒佢上、碰。母親每日上午出門，晚飯時分回家。來香港後基本上如此。唯中年有幾年未能好似返工咁勤力。家中唔夠開支，要去食肆收銀。
    但母親步入80中後，牌友陸續行動不便，湊唔夠腳。母親困在家中，終日呆坐沙發，學術上或叫做抑鬱。但冇法，她縱使仍可走動，但冇第二的嘢想做。她這種出身的上一代人仲有一種hang up：唔願去社區中心，但又冇錢入乜乜會。來來去去幾個舊友，年滿80後，買少見少。最後end up入院。

    母親後生40年的話，湊唔夠腳或者會試下上網，北美、英、澳的阿太話唔定章法仲高。

    同理，而家人人都用社媒，邊個仲會俾錢報館登訃聞？打開Fb，鍵入Our dearest XXX passed away on….。幾乎全球的有關人等24小時內都得悉，隨手留下「condolences/節哀/RIP/May God be with you…」。有了Zoom，連追思（當然也包括喜慶）都天涯若比鄰，病毒冇有怕。
    因此，今天仍得以見報的噩訊都來自名人，主要是藝人，次之是文人。從藝人訃聞可見TVB黃金時代的終結，從而聯想到我這代幸運的baby boomer正在走入歷史。
    文人方面，前兩個月，有一位是當年帶我出道的著名政論家。我最近路經當年這位前輩每逢月底午飯後，帶年輕同事撐上去幫助消化既大斜坡。要搵日再走一次。
    回顧自己過去呢年，實在好感恩。唔止冇穿爛，甚至冇中招（雖然唔係經常驗，但至少冇不適）。
    不過，近日親友陸續中招，自己怕亦走唔甩。只望唔好撞正過年。短期內相信都買唔到感冒藥，最怕過年染疫，要閉關訓足一周。

    與此同時，更記掛外地親友面對的問題，為他們祝禱。
    北加州連日地震。雖然輕微，但一次又一次，希望唔會累積爆發。
    我住過的兩大城市，紐約市3毒（流感、新冠、另一種呼吸道病毒RSV）齊發，可能短期內要恢復口罩令。

    美國中西部寒流到（不過都慣咗）。對我恩同再造的恩師榮休後在芝加哥定居，年事已高，希望他安度。

    英國今年可能是幾十年來最tough的。通脹、罷工、能源…，爭議不斷。鐵娘子的時代已成過去，現在的保守黨政府不可能再用強制來令工人就範。護士罷工、暖氣不足，希望移居當地的朋友安好。

    此外，香港要準備迎接與內地通關引入的疫情和重臨的旺市。內地放開後的疫情似乎超乎想象。有說3,000萬人的上海怕已有幾百萬人中招（包括無症狀）。如果比率係10%，咁即係京、廣、深、津、渝、成…等千萬人口的一線城市，個個都有100萬人染疫，全國過億。如果1.3或最遲1.9開關，實有萬計既人借過年湧出離避疫。香港呢次過年，要預咗市面同疫情齊飛。而家必理痛就已掃清，到時港人中招撲唔到藥，又要係醫院門口頂寒風，難免怪責內地來客，矛盾又起。
    與此同時，更會有十萬計的內地人湧到華人最多的英語五國過年避疫。這些國家早已慣咗躺平，突然要重新實施入境檢疫，國人難免嗷嗷聲，加上社區再爆疫，可能又再掀起仇華情緒。
   以上的不幸不一定都materialize。但疫情一爆，往往拖兩三個月，社會怨聲載道。少一點準備都不行。