190915日午後32°C 67%：且看今晚會幾勁

   朝早黑雲密佈，中午起陽光普照，可惜我出唔到街。
   九月堅持博咗13日，昨終於衰咗。
預定今日落唔到街，昨午出去飲茶買餸。回家後適逢今季較好睇既日劇〈凪（人名）的新生活〉本週更新，食完飯睇，唔想再「博」。
   昨午係灣仔既連鎖快餐店，狹窄的通道內，一個身材高大的深膚色員工彎腰讓路，像歐洲古時的紳士。我條件反射說，“Thanks”。換來的是粵語「唔使客氣」。這才醒起，係平民鋪頭打工既非華人，十有九都識的本地話。摩理臣山附近常見南亞人，士多仔都有幾間。
   回程搭大巴。來了架南區車，乘客逼到出前門。停站時只開中門落客，似乎唔想俾人上。我敲門，企係司機位旁邊的菲傭示意，司機才勉爲其難。
   上咗車，全程企係司機前門附近。旁邊是一羣彼此相識的菲傭，嘻嘻哈哈由頭玩到尾，甚至拉隔離同伴既bra，又扭腰作跳舞狀。其間只聽到兩個英文字"beauty pageant"。笑同伴準備選美？看來菲律賓人性格似拉丁，做工人都咁開心。印傭就reserve好多，肯定與宗教有關。

   至於今日，事前就預咗會好勁：靜咗一週，休養生息，補給充裕。加上什麼國際人權日，百萬人出街唔奇。
   現在加上內地來港既紅牌騷國旗唱口，本地藍派四出清場，與黃絲開片。黑衫人今日仲唔大嗌：你班撚同我死出離！恐怕黃昏就開始爆裂，而且水銀瀉地，玩到接近凌晨。且看雙方今晚有乜新招？有幾多人要食大茶飯？