今8.31，民間果然showdown。
午飯過後，我見大太陽，落街飲下午茶，撞正大羣教徒沿金鐘道上花園道。警方在美國總領館對開處舉旗，大聲嗌非法遊行可被檢控。但以黑衣爲主的人們照行。事後睇電視，教徒話去教堂。的確，呢區是基督/天主教的核心重地。曾蔭權成日離祈禱！現任特首都信天主啦！
但唔知係唔係因爲我逆教徒人龍而行，上天唔Like。陽光轉眼就收去，我轉入金鐘道就開始落雨，越來越密，打開背包套上薄風衣都溼透。只好頂住雨，逆人龍的方向，向東衝到PP落地鐵。呢餐下午茶食得辛苦。但大雨之中，在人羣裏逆着穿插都冇撞親、跣低，上天仍然是眷顧我的。我或應該加入教徒行列，入教堂誠心禱告。
飲完茶回家，回家的小巴停駛不特已，連搭大巴入中環都塞車、兜路，同行路既時間差唔多。最終，天助自助者，索性行路回家，練腳力，兼睇下呢個大日子既人生百態。路邊有地產公司「劈價」的大牌，幾個盤各減價約一成。溼溼碎！
意料中，今晚，繼和理非之後的勇武餘慶比上次更勁。黑衣人出汽油彈，多個地區火光熊熊。綠衣人則首次show水炮車的quali。藍色的水柱據說上身就好難甩。黑衣變藍絲，嬲死勇武人。
寫到呢一刻，港九核心地帶都已大致勇武嗮：港島由中環到北角，九龍除了彌敦道由尖沙嘴到太子，東邊的觀塘和西邊的荃灣都捲土重來。
我唔想俾人話煽動。但會否還有半夜場，玩埋幾個有仇口既地區？地名恕我就不說了，只希望讓我食咗最多晚催淚彈的故居抖番晚啦！
至今爲止，據說以太子站的綠衣表現特別厲害。明天相信是AD當然的頭條。
歷經今晚，被捕的人數應該突破1,000！檢控方，辛苦了！
但勇武今晚的表現，是否已足以讓當局引用《緊急法》，此後「一勞永逸」？
沒有留言:
張貼留言