210630三午晴32°C 72%：萬億(港元)巨富既新居

 陰雨一周，中午終於放晴，好似迎接明天既大日子。

謝網友提醒：盜竊搶劫案照例要交回贓款/物。言下之意，刑期不完全與財物損失的大小相關。

但現實中，我咁蠢都念到：如果穿櫃桶底，肯定唔會1.一次過偷大到上面會警覺既數目（除咗搶金/錶行、銀行），但求螞蟻搬家、細水長流；2.一到手就a.fing 嗮或b.將偷離既錢轉俾家人，用家人既名買股買樓。

連鎖壽司案既被告穿櫃桶底頭尾2年，我唔信會逐次存入自己既戶口，累積到2,400萬，等警方起贓。失主報案時，筆錢怕早已散開。以香港既法律，冇理由封家人至親既戶口同資產卦。唔通你逼人老婆仔女賣住緊既千呎豪宅還款呀？話唔定佢離埋婚添。

當然，我費事查細節，睇下起回幾多贓款。但追番兩三百萬怕都係奇跡。

嗮氣還不如講個趣事：

Tesla電動車既老細Elon Musk係全球頭兩三名既巨富，財產以千億美元為單位。以前係加州自然係住萬呎計既豪宅，游水池、網球場、馬房、...一應俱全。

但最近覺得加州針對佢，一怒之下搬過隔離美國第一大（以面積計）既德州。新居梗係大到連邊都望唔到啦！睇牛仔片都知，有的牧場可能大過港島。

錯！Mu生既新居（上圖），20呎x20呎，細過絕大多數本地網友既屋企，只好過劏房。可能相當於香港政府起既貨櫃臨屋。

德州係美國南部，有好大塊既沙漠，一般好曬。住圖中的臨屋，即使有冷氣，照頭曬落離，怕都幾係嘢。

當然，這可能只係Mu生既中轉屋，正式既皇宮而家裝修緊。但即使係過渡期，幾千億身家訓鐵皮籠，都好難得。只有美國人先有咁既behavior，西歐人絕對唔會。又或者，Mu生特登住籠屋，博宣傳...