200326四深夜23°C 90%：意日內超中，美或後來居上

   今朝晨運被微雨攔門，清明近了。追遠變虛擬，先人也無奈。
   武漢周邊的港人回來得七七八八。但唔接返摩洛哥、祕魯…的港客，林鄭等住媽。 我地港人而家遍天下，一個也不能少！
   昨起，本地焦點由歐美港人帶疫回歸變成本地酒吧爆發。但酒吧非華人背景強，正如歐美封城下的大衆，冇咁易話爲。今日有相話，倫敦地鐵車廂逼滿壯男。戴口罩？戇居！
   多想就比較明白，戴口罩係一個東西方截然相反的文化問題。呢次東方人叻過西方人。
   我上次趕上博講得差。現在再總結一次：
   歐美從小既教育係：有病要帶口罩。所有人因而形成思維定勢：冇病唔應該戴。雖然常識都知道係戇居：病毒/細菌潛伏而未發病期間（武肺長到14日），宿主冇感覺，以爲冇病，但會傳俾人。
   我唔明既係，點解歐美醫生無意糾正大衆既呢樣無知，唯有東方醫生緊張。
   除了有病先戴的教條，歐美人唔戴口罩仲有2個理由：
   1.科學上：相信常見的外科口罩/surgical mask擋唔到病毒/細菌，戴離冇用。但東方醫生認爲可以。是否請歐美醫生澄清一下？答案到底yes還是no?
   2.社會性：我上次講得唔清楚。歐美除咗病人，只有對住有毒或厭惡性物質時，例如倒垃圾、洗廁所、處理廢料、做建築裝修、落下水道、…，先戴口罩。你而家對住我戴，當我係穢物呀？西方人最唔忿氣被歧視。你好人好貌，行得走得冇病，對住佢帶口罩，佢會覺得你隔離佢，好似舊時白人對黑人…。
   
    最近呢排，東亞確診數幾乎「停頓」。即使最近海外回流倒灌，增幅相對兩個多月以來的累計仍算少。但歐美狂升。東西方的均勢突然倒過來。中國自文革以來就高呼超英趕美，現只差最後一個目標。
   但武肺一來，近周西風壓倒東風。中國爆得早，至今仍全球第一。但隨後的意大利、西班牙、美國、西德你追我趕，最近日增10%以上，甚至高到20%。若此，不夠一週就倍增（翻一番）。
   意大利看來不出後天就會超中。美國若走勢持續多4-5日，甚至有可能超意，再度領導世界。
   英國在歐美大國裏確診最少。但現在明白了，並非真係咁乾淨，而是初期放hea唔檢疫。冇檢自然也就冇確診。記得上周有兩日甚至冇更新數字。實數絕對唔會少過德、法。
   至於內地，前一排連日話冇新確診，唔怕講，我唔信。按統計常理：14億人居住咁密集，正所謂眯埋眼拋粒石都會掟到人，點可能一個確診都冇？而家先知：裏邊既習慣係，只要冇病徵，即使檢測陽性都唔當確診。
   你話14億人呢的陽性會有幾多？一萬幾千怕走唔甩。