200301日午後26°C 70%：大邱俾武漢累死？

   昨原來係反修例8.31半年祭。我冇睇直播。但一晚拉115人、有警員掹槍，近月最勁，顯見忍者的韌力。
   
   幸而昨晚傳教宗中招係流料。話係感冒，今已復出。RT200301HKT19:51〈方濟各：感染風寒〉。
   
   華人地區疫情緩和的同時，韓、意、伊接力上。至昨爲止，韓3,000級；意、日1,000級。伊朗或統計不全，計到足怕不少於意。德黑蘭否認死200人，鬧西方造謠。但世人多數信BBC。若此，按2%的死亡率推算，10,000人確診。
   但日本係另類：郵輪佔咗600幾，境內實數300多。安倍死都唔肯對華封關，我估：
   1.中日關係惡化多年。好辛苦先請到習近平4月來訪，絕不能告吹；
   2.急於借今夏東奧重振90年經濟泡沫爆破以來的頹勢。
   但而家習來訪延到秋天，說明安倍承認鬥唔過疫情，死撐落去只怕更難收科。
   日本多韓僑，機程只係個零鐘。眼看南韓爆成咁，東奧怕都講唔埋。

   疫情本屬科學，但落到人間論功過，必扯上政治。何況香港黃藍有你冇我。
   藍報昨引述韓媒，指全球掀「恐韓症」，South Korea被譏爲South Korona（冠狀英文係corona）。古今中外，大難臨頭時，人人恐懼，必找scapegoat。政治再正確也擺脫不了人性。但先進的社會有法治和價值觀約束，歧視只係個別案例，可一笑置之。
   但黃報派記者赴韓，說〈大邱教會成員1月曾訪武漢〉。換言之，中國先係毒源，鍾南山權威破產。更學大陸突出正面：〈大邱人無懼感染派物資自救；女藝人捐錢救災〉。
   藍報的報道應係翻譯外電。但黃報在裁員摺週刊之時派記者赴韓，點只係做新聞？去年港人反「暴政」，韓國影人飛來支援。今年反建制韓片《上流寄生族》打低荷里活所有的英語片，首次以非英語片贏得奧斯卡最佳電影（唔止係最佳外語片）。特朗普嬲到爆。
   如今國際手足爆疫情，備受全球壓力，黃報要撐，與韓人攜手反毒源。