210925六晨晴29°C 73%：3年死結終開解

週六清晨外出散步，想起久未去舊公園。但最終想起公園另一頭既鬧市有閂咗十幾年既地標翻新成景點，索性去見識。

行山係擺脫都市繁囂，崇敬大自然不變的美；行街係把民間脈搏，睇社會變遷之道。我本性世俗，鍾意社會，傾向後者。

不料，新景點仲未夠鐘開門。但總算睇過門口既水牌，似乎主打中產輕食。

接著就近去食一個月難得一次既外來早餐。點知最近既大連鎖，櫃位前怕有10個人輪緊，龍尾要探頭埋去先見到餐牌。看各人的打扮，估係趕八點開工既藍領，佢地冇周六架！

因此，我唔反現代。唔喺唔明現代化既副作用。但要維持社會既運作，讓中上收入既白領、反現代既文化人放心地生活，就不得不有千萬計既藍領朋友盡忠職守。所以，我敬重每一位要捱更抵夜既朋友，無論係IFC開通宵炒金股、日入近萬既fintech精英，「三八」班既醫護，抑或月入一萬幾千既大廈保安、維修工友。有佢哋，我哋先致有覺好瞓。

行過隔幾間既連鎖，好在冇咁多人。食咗個腿通炒蛋多士既港式早茶。但體虛，始終頂唔順港式冷氣。港人從細慣咗開足冷氣。我呢類老人只有帶多件衫，自己執生。但衫要輕薄，爲背包減重。

食早餐時瞄手機：華爲太子女已擺脫溫哥華將近3年既稽留，飛緊番去深圳。對中美都係好事。講原則，中方或覺得「認罪」冤枉。但論實際，事主人到中年，父親步入老年，拖多一日就少一日。千億王國仲有大把嘢可以做。

寫到這裡，加拿大傳聞：華爲太子女獲釋後，兩名以間諜罪在華判刑的加人獲釋。

加國執政黨剛以非過半數議席連任最大黨，現任總理可望繼續執政。中、美/加過去3年來互相捉放曹，背後的文章不足爲外人道。但解開死結總好過互相拖死。