210923四中秋後復工陰29°C 87%：雙十禁忌講定先

今9.23中秋假後復工，保安局長藉建制報頭條〈警告：勿趁「雙十」分裂國家〉。17日前就講定，你既可以話「仆街靠嚇」，也可以話當局「好心」預警，唔想到時有人撼頭埋牆。

是否因應日前被拉，以踩國安紅線為己任的一個學生組織幾位主持人？

講心，呢個組織好「偉大」：親身試法以找出紅線，以便同道有規可循，繼續玩而唔使坐監。

但我呢種冇膽匪類，就唔信紅線一界定就唔會變。

唯物辯證法首先就話，量變到質變。以雙十為例，一個人著住青天白日滿地紅T當街行，當局或者勸兩句，隨手買件T俾佢換咗就bye bye。十個人結伴咁行，官方怕就唔會當冇嘢。幾十個人舉旗操兵，就肯定有case。嗌埋「萬歲、反攻」，肯定好難甩身！

再說，著民進黨T可能又較青天白日滿地紅T更敏感。如此類推，沒完沒了。

測試過一次底線就唔變，只怕癡人說夢害死人。

但講到底，咁係國民黨旗前紀念雙十革命、武昌起義又得唔得呢？