210910五晚30°C 71%：死蠢

退休後，與世無爭，除了一樣。

10幾年前起，每隔4周就要早起，報政府既gym班。起初要起早去輪隊，後來可以上網。但通常開報個朝，不出20分鐘就滿瀉。

報唔到，接著嗰4周冇班番，多數會hea。下輪即使報番，狀態也不如前。中央話齋，不進則退！

及至大約5年前，形勢更緊。不止一間名氣gym由於推銷手法，宣佈結業。私家gym友搵出路，有的過離幫襯政府，令政府班的名額更買少見少。

最近這一年更麻煩：限於疫情，政府gym班人數減半。如果以往報名日20分鐘就爆滿，而家開報10分鐘就已玩完。

因此，啲gym班舊生，每逢報名日都教定鬧鐘、打醒精神、互祝好運。

我係呢方面都算落力。10多年來只有一兩次，因為家中電腦、政府網絡唔聽話而被飛。

但今朝又爭啲死火。因爲政府改咗報名既網頁，新增既問題針對我呢類人。慣常所有要declare既問題，答案都係Yes。唯獨呢條新增既問題，答案相反。我懶睇說明，按例click Yes，接連被彈番轉頭：錯誤！我又好蠢，以爲自己click錯，重頭離過，但來來去去都被reject。最後以爲過嗮鐘，俾人報嗮冇位淨，click No就No啦！咁先獲接納！

針對我呢類人既新問題，意思大致係：年逾70，日常唔多做運動，又或者健康欠佳，或要出示醫生證明，先可以上堂。

因此，報名人一定要話自己No，亦即常做運動、健康OK，唔使醫生紙…。

我邊會咁念呀！於是自取其辱。