昨趁過九龍辦事行大運。第一站佐敦澳牛。排咗6-7個人，再見「鄭君綿」。咁啱係年來去澳牛最旺既一次，座位由前客起身埋單到新客坐落替補，約只十秒鐘，更首見餐飲接唔上，要提醒伙記。也因此，要老資格既鄭大哥開聲指揮。
記得我話，澳牛、大排檔呢類伙計純憑記憶，但上菜超快、分毫不差的運作，值得Harvard B School研究。如今有了大數據、AI…，怕更可以將這種純腦力管理總結出一套algorithm，即非放諸四海，也至少三海皆准，不僅節省人力，也減少落單疏漏、上菜延宕導致的拗撬。
與港排擋式管理同樣值得商科研究的，是印度孟買的中午送飯。每日可能有幾十萬個家庭飯盒，專程準時送到事主返工地點既寫字枱，收費絕大多數孟買打工人都負擔得起，不可思議。
但冇人肯研究，我又可以理解。B School教授和大商家怕懶理小生意； liberal人雖然關心弱勢，但志在政治，不屑商業，最憎銅臭。只怕澳牛、港式排擋的經營秘訣，最終失傳。
講番行大運。擒日轉陰，「向午」（原来台灣詞典都咁寫，並非「晌午」的簡體）起，我沿觀塘最旺既街行去海皮，然後沿海濱公園行到尾，順便睇吓副眼鏡喺陽光下點變色法。淨係海邊個段路怕都有2k。
此長廊一邊係海，另一邊係工廈，風景不及港島海濱和沙田城門河畔，但勝在地多闊落。沿海有兩條平行路，中間以綠蔭分隔，每條路怕闊3米幾，啱慢跑。但冇單車徑，難免有人唔Like。
而家的人最叻係為自己爭權益。再好的事，也總有人冇份，企出離complain。記者憎現狀，遂專挖complain。一來借關心弱勢攞分，二來藉機媽政府。因此，傳媒一年到頭都係查找不足，絕少俾人覺得社會有改善。
回到正題。昨雖然陰天，但仍有太陽，遊人疏落。我唔怕曬但怕人多，啱嗮我。但只記得行，唔記得試下慢跑，可惜了。
但海濱公園行到盡頭有啲掃興。中間有一大截係冇路既路。我唔想行番入鬧市，要等對面有人行過離，判斷條路唔係掘頭，先敢繼續向前。
前面唯一認得既地標係紅色既九龍灣大商場Mega Box。但前路轉折，行咗好耐都未到。反而有大路牌話左邊係兒童醫院。以前搭巴士經過，但擒日行到空曠處先醒起，大路牌係俾揸車人睇既。行路人靠佢就死。揸車3分鐘，行可能要3個字甚至唔止，因為中間可能俾公路截停。
好不容易來到Mega Box，久違後變咗身。以前多數係大型傢私鋪，空寥寥，冷清清，而家有Aeon、Ikea兩大鋪入駐，人流旺咗。
但周六下午，較旺區商場氣氛仍差一大截。看Aeon、Ikea念到，較適合「成熟」的消費者。
MegaBox始終受制於交通。縱使提供免費大巴接載遊人來往最近的九龍灣站，但在終站落車後，仍有一大段路才入到地鐵，居間要上落幾次梯級，扶老攜幼的話怕要念過先。
但九龍灣站既商場就川流不息。呢個就係香港同內地呢類高密度地區既優勢。換咗西方人相反，首要空間大、冇壓力，寧可偏遠，因為自己開車。
行咗一輪，想飲下午茶，但嫌人多，上地鐵去油麻地，試Sukiya的另一種牛飯。日間似乎任何時間都有人在門口輪候，但裡面明明有空位。或因此，前面雖然只有6-7個人，也要輪近半個鐘。彌敦道當街，係人都見到，借顧客輪隊來博宣傳?
幾乎所有輪候的都係20上下。長時間企係陽光下，無聊之餘，看著食肆的日文名「xx（2個日文字母）屋」，試按其英文拼音su+ki學寫呢2個字母。其中第二個好似甲骨文既宮女跪地面向左方，捧著一盞燈。唔記得中文係乜字。
日文有50音，每個音係consonant+vowel，唔同英文字母，一係consonant，一係vowel。但而家先離學，而50音每個像英文分大寫同小寫，亦即要學2種假名，合共100個符號，仲有冇咁既記憶力？
而家睇日劇，越來越多藝員個樣好熟，但就係唔記得名，又或者過後一個半個鐘先醒起。希望唔係Alzheimer先兆。
沒有留言:
張貼留言