220518三晚24°C 65%：信兩成都嫌多

怕聽日鬆綁2.0會逼，今午去金鐘試坐東鐵過海段。但沒有在會展站出車觀賞站內設施。

過到旺角，路過電腦中心。對著大門的樓梯不見有人上落。上到第一層，商鋪都開，但賣的幾倍於看的，看的又幾倍於買的。而且，看的似行街多過shopping，最多不過買一兩百元周邊。我只在十幾二十年前被大陸杯葛的高雄見過咁淡既商場。只不過呢次改拍疫情烏蠅。

沿彌敦道南行，路經幾個月前門口仲有十個八個後生輪候既日本牛丼連鎖。呢次門口竟然冇人！今日既後生敢作敢為，唔會因為第五波而縮沙啩？除非我等聽日鬆綁2.0再離睇，否則難以確定原因。

接著去新填地街市買生果。呢個街市夠街坊、基層，顧客有揸柺杖既婆婆、南亞主婦，偶有全身黑袍半掩面既穆斯林。檔主一般也比較好相與，光顧十蚊都「多謝」。我也好「唔該」啲檔主阿叔阿嬸。

不用說，油麻地居民多基層，街坊既街市主要賣大路貨。中上客買生果會揀鄰近既日式果欄。後者賣靚貨，價錢係街市既幾倍，而且有街市冇既精品。

今日對我離講，最震撼既報道係傳統大報有長期專欄說〈元老施壓 習下李上〉

此欄收費，我只睇到免費閱讀的頭一段。摘錄如下：「習近平將無法連任，或需交出經濟大權，由總理李克強接掌...證據...是李克強近期在官媒曝光率上升」。

呢種中南海「小道」在文革後期到改革開放初期不稀奇。當時誰是元老很清楚：以鄧公為首的黨國元勳。但回歸後這25多年，這類傳聞基本上絕跡。即便內地既14億人恐怕都冇念過，有邊啲人會叫做「元老」。

港已進入新時代，唔再係亂噏既年代。這種無厘頭，信兩成都嫌多。

但與此同時，港台網站今午17:13說：〈李克強早上到雲南視察　並出席雲南大學畢業生招聘會〉；接著20:18說〈李克強：新措施能用盡用　努力使經濟較快回歸正常軌道〉。一天報兩次，的確不常見。

不過還是那句：放開吧，中國吉人自有天相！