220513五晚黃雨25°C 96%：陰暗的週末

過去24小時既話題：黃雨反反覆覆，甚至一度轉紅。週末兩日的天氣仍會反覆，游水仲可以，行山就冇計！

清晨醒來，一看紅雨，學校停課，心想大劑。上午預咗要杜牙，而且上星期開咗頭，今日埋尾。除非黑雨診所唔開，否則要依時到達。最怕去診所途中淋到周身濕，俾冷氣凍病。老人好易肺炎，好多人番唔到轉頭。

幸虧紅雨係半夜4點多上既，大雨落到8點已七七八八，轉眼連黃雨都撤下。於是全身Gortex好似外遊。出門時微雨，拉高風褸既hood就搞掂。遮都慳番。杜完牙出離更放晴，可以係街食埋飯先番歸。

今日呢場雨都幾有人性：今晚收工後先再落過。當然，一眼針冇兩頭利，晚間開巴士、的士，尤其係揸電單車送外賣就慘了，怕淋到一隻屐咁。好多係南亞裔。

過去24小時最大既新聞唔係俄烏戰事（雖然，可信俄再次失利：俾烏奪回的失地，更再次有艦艇被炸），而係北韓。但唔係射飛彈，而係疫情：報稱5月至今累計35萬cases，1人死亡之類。

但2,000幾萬人口，呢個數字其實no big deal。真正既big deal係：全國lockdown，中國也望塵莫及。

北韓本來冇疫情，因為對外封國，國外病毒冇路入。但萬一走甩一個case就死火。一來冇人染過疫有抗體，二來冇人打過疫苗（唔計黨國精英），只能靠硬封鎖來防止擴散。

北韓人冇打針，原因據說係唔接受外國捐贈疫苗。因為打針既記錄要上報國際、受監管；連中、俄兩大盟友捐都唔受。

問題係：自己又幾乎不可能研發。因為：國內既然冇case，也就冇患者可幫忙測試疫苗是否有效。兩年前中國就因為case少，開發疫苗時要交俾巴西測試。但北韓冇friend冇錢，有邊個國家肯怕心口呀？呢2,000萬人真係望天打卦。