220509一晚25°C 83%：選特首既「飛」都要讓路

李家超拜碼頭：合宜。

聽日媒體會炒：邊個冇被拜訪？

下一個考驗自然係班子。大黨至今予人的印象，係人才不怎麼樣！

普京閱兵聲稱攻烏有理：份屬正常。

美統派夫人訪烏打氣：再次說明美既撐烏又顧忌。

亞速鋼廠平民撤嗮係好事。但接住恐怕會重演古希臘的「戰狼300」：守軍極反俄，俄軍視為「新納粹」，不會留情。

烏方和西方鬧俄軍「戰爭罪行」多過講戰情，固然是弱者的宣傳策略，但也令人懷疑戰情乏善可陳。

西方唔敢出兵，只願出武器。俄軍遂用導彈襲擊運送武器的火車、港口、倉庫。烏軍除非能攔截俄導彈，否則到手的武器怕唔夠5%。

原來週前烏軍能擊沉俄軍的旗艦(艦隊的海上司令部)，係靠美方提供情報，確定俄艦的真身。原來，情報可收窄弱者與強者兵力和武器的差距。話唔定，西方送武器還不如俾 tips。

元朗有酒樓生出12疫鏈。點解唔見專家臨場視察搵環境因素既？

近日最值錢既飛，原來唔係選特首既，而係睇姜啤等12子登台既前排。呢段日子，識在位既姜啤好過識候任特首。以特首40萬既月薪，想坐第一排親親12子，都要捱足一個月。帶位怕都要好close先有得做。

至於才子話人虛火，過時啦！新一代既感情，唔係60/70後可以理解既。

只要睇姜啤話：會努力變實火，而唔係頂番轉頭，留番的面俾老人家，就知道呢班靚既處世智慧，勝過我班老嘢好多。