220508日晚25°C 81%：睇下今後5年點

回歸25年，以呢次特首選舉最簡單：答案Marquez話齋：foretold；得票憑常理可知會有九成。

月前就有網媒玩猜領袖，似乎想做kingmaker。但人貴有自知之明！記者有一種常見的病態：既以“為民監督權貴“自居，但又禁不住權力的誘惑，想抑甲揚乙來左右權貴的更替。

而且，自由派記者左右權力的慾望可能比保守派記者更大，自以為為大眾選賢與能，有功於社會。

我事前估得票接近95%，理由好簡單：

1. 呢1,500選委唔會唔出席投票；

2. 念唔到會有邊個選委唔投俾李家超。

棄權票+反對票+過失（無意填錯）票~1,500x5%=75票，好多架啦！

如今得票證實更多：99.16%。中央的組織力由此可見。

以直選來衡量，無疑不以為然。但歷經2019年的動盪，誰還會預期這次的選舉會以「常態」進行？

對750萬市民來說，檢驗真理的唯一標準係施政的實效。俾2年時間睇下點？

李說以起樓而非23條為先，怕係中央的路線。自由派政治掛帥，最好佢以23條為先，激惱啲後生。但起樓只能在技術問題上挑剔，潑唔起民憤。

李唔提政改可信係同樣的道理。明知社會意識轉向之前冇可能直選，只能先改善民生，贏得口碑後再回過頭來講政治。

我好少睇電視新聞，今晨罕有地睇到投票場外的直播。因為：咁啱陪人去公院睇急診。由此想起，除了昨天說的安老，近年有一樣深有所感的是：希望醫療能顯著收窄公私營在收費、醫護vs病人比例上的差距。這並非純粹為病人謀，同樣希望大大減輕公院醫護的工作量，俾能更貼心地照顧病人，減少工作壓力導致的疏忽。

我很Like公營醫療，體力能應付的話，都會排公營。但公私營收費差距太大（至少差10倍），必然將90%的病人逼去公營，以致醫護做到死，病人排到死。

還有一個問題是：牙醫。近年光顧了幾十次牙醫，知道牙醫做得好辛苦，睇一個症閒閒地要好用力咁搞半個鐘，似做車床，建築。唔似內科，睇一個病人幾分鐘，唔使幾多氣力。

好明因為咁，公院既牙醫只服務公務員，公眾只能睇私家。但牙醫杜一隻牙根要好幾千蚊，因為工夫多、好辛苦。七旬長者每年2,000蚊既醫療劵，只夠補牙、剝牙。

政府有必要在這方面幫基層長者。我唔係為自己爭，而是從實際經驗出發。