210831二晚27°C 87%：衰天兼好天

210831，香港難得的衰天，我難得的好天。

早餐過後出門，灑了一陣雨後天色轉青，以爲係慣常的過雲雨。點知就近中午起，落足整個晏晝，包攬了我今日遠行的全部途程。

而且咁啱咁橋，離家後開遮，先發覺爛咗，名副其實「撐唔起」。全程要用手頂住上半部來維持開啓。好在雨唔算大，否則都幾杰。

中午去北區。午飯後，友人陪我步行去車站，沿途有幾百米長的公共蓬蓋，幾乎唔使擔遮。而且，沿途一片翠綠，市區難得一見。

港九鬧市方便在密集。但新界又未疏落到西方那樣不便，卻享有田園，不僅是更多的空間和空氣。港九vs新界各有各好。如果我唔係喺鬧市成長，可能都會選擇另類的生活。

下午從醫院出來，到觀塘見識重建後的裕民坊。原來室內的食肆延續裕民坊傳統，有攤檔冇坐位。見有久違的粢飯、豆漿，買了無處食，只好落街。雨幾密，勉強搵到個路邊闊唔夠2呎既蓬蓋，縮入去解決。2隻手，遮、粢飯、豆漿3樣嘢，好似玩雜技。加上幾尺外有人吸煙，邊食邊聞，難得的下午茶。

今午的醫院候診室未見過咁爆。我係常客，每次晏晝離，素來都好滿。但今午座無虛席不特已，連走廊都企咗十幾二十人。通道唔夠，不時有長者、輪椅要借過。縱使咁逼，我企咗將近半個鐘，避人怕有十幾次。但由頭到尾所有人都好安靜，甚至冇人大聲講、播音樂。這就是公民社會，又怪唔得啲後生咁自豪珍惜。

新聞話有大學醫學教授在外國打咗2針後，返港唔聲唔聲，再打2針。被記者問及時，理直氣壯，話自己每年交20萬稅，有權打針。反過來，此人既然在港工作，此前在外國打針，或者係在當地讀書時入咗籍，享受公民待遇。

精英就係精英，兼享西方的安全保障與香港的繁榮富裕。我地一般人冇得恨。Btw，上述教授單名。

歷經社運一役，騰籠換鳥後，社會風氣相信也會相應生變。到時的醫院候診室仲有冇咁安靜忍讓？還是說，我有身份證，有公民權利，我要見醫生…。

未寫完。但夜了，出咗街大半日，累了，改日再說。