210817二晨陽光普照28°C 84%：谷針冇效，第3針又冇行，難乎哉

本地連月冇case，所有都是外來。千祈唔好上街嗌「光復」呀！

目前既拗撬係：δ太厲害，幾乎冇疫苗頂得住。有議員自爆：2月上京打2劑國藥，近日抗體數跌至「邊緣」，促特區為市民打第三針。但官方目前志在谷未打既人，懶理已打既。

但未打既人睇樣多數不爲所動。老既怕大都係院舍，難以自行作主。後生既怕唔Like政府，刻意杯葛。若此，怕無論點谷都唔會落場架啦！你就俾心機等啦！

日前見常去既室內街市有魚檔受污染，擒日gym後買餸即刻唔入。今日無意間click入強檢地點名單，原來除咗一處，統統係機場同連帶範圍，再次說明疫情係the revenge of globalization。

東奧後，新聞話日本每日有2萬case。初以爲睇錯，原來係真既，單東京都就5,000，印象中遠超疫情以來的記錄。好明又係δ！

美國也再次日增近20萬。但恐怕好難救，他們最自豪的價值觀念使然。日前，一個成員多在北美的港人長者羣體，由於美加通關會否加劇疫情的切身利害，罕見地議論起「政治」來。

美國有人死唔戴罩，有人話係文化使然，因爲昔日牛仔時期，的人做世界先至蒙面；也有人相信係美國人自細養成的觀念： 'No one can tell me what I should do or not to do.  I'm my own master. '而家甚至係唔少香港後生既至寶。

凡有禁制，就有人念計走精面。近日最有創意的是：人在萬里外，寄血樣回港驗抗體，以便回港時可縮短酒店隔離。本港的專業機構幫人化財擋災，照驗照發有效的證明。冇人問唔係當面抽既血，點知是否屬於該人。呢的就係港式精仔！