210820五晨晴29°C 73%：人人「依法」，各有各法

塔利班講明冇民主，亦即冇普選；但會「依法」授以女權。

但國有國法，家有家法，塔利班本於伊斯蘭法，女權與西方比應該差一大截。

或因此，在西方虎視眈眈下，阿富汗的反對者包括婦女，上街抗議。塔利班若忍唔住出手，勢將退回到20年多前上台的宗教fanatic形象。西方不會承認只會制裁。

由此想起中國。中國也都強調「依法」，依的是共產黨制訂的中國法。香港回歸後與上面的拗撬甚至衝突，往往就是因爲百五年來慣用的港版英法，與國法有時格格不入。到現在上面才大筆一揮，用國法「一統」港法。

但國法在政治方面比港版英法嚴格得多，令不少港人覺得失卻百年以賴的「優勢」，十分冇癮。何況不少人反共，今後難以上街鬧仆街。

有人話，西方可以上街鬧總統、總理，甚至當街燒、踩領導人的相、漫畫。但中國觀念唔欣賞呢種自由。美國總統每年按例要出席華盛頓記者俱樂部既講笑晚宴，上台自嘲。台下笑得越勁，總統聲望越高。但中國連用領導人既形象畫漫畫都可能犯法。

但講到底又無法。香港依法係地方政府，國法高於港法。若兩者有出入，必以國法爲準。

這就如香港至今都話：中英文版若有出入，以英文版為準。因爲，英文係九七前「祖家」既語言，香港所有法律、公文都係用英文寫既，然後先譯成中文。英文為主，有法律效力；中文爲輔，僅供參考，係香港既常規。

總之，今後國法爲本，港法爲輔，冇得拗。