210819四午後 雨後晴29°C 87%：念唔通NZ既Ardern

δ全球肆虐，英國7,000萬人日增約3萬，美國3.3億人日增約30萬。但東南亞仲慘。

歐美打針率高，但死在個人主義，自由至上，拒受約束抗疫。

東南亞輸在窮和人多而密。住得密，衛生差，搵食爲先，顧唔得避疫。加上缺醫療、法治弱，抗疫難免馬虎做假。政府也冇錢買疫苗、有貪腐。即便有外國送也唔夠分，又或者效力弱。

其中2億幾人的印尼和1億人的菲律賓更有百萬國民要去鄰國搵食，傳出和帶回疫情。

月來連較富裕的大馬也勁爆，最富有、強制力最強的新加坡也因爲外來人口多而閘唔住。可見東亞已無完土。

香港決定10月再辦街馬。希望輸入的個案唔多。

日前，清零已半年的新西蘭也被δ攻陷：首都奧克蘭確診第1人後，3日內增至21人。呢個500萬人既小國話，潛在的人數或過百。源頭可信係本月7日來自脣齒相依的澳洲悉尼。

女總理再次當機立斷，手起刀落：首都圈封城7日，全國其餘地區封城3日。

封城者：只准超市、藥房等民生必需的商鋪營業；百姓非必要唔准出街。香港好在未試過。

但我念咗成年都念唔通：NZ係好西方既國家，白人爲主，至今屬英聯邦。女總理出招快而辣，幾乎一見就斬。雖也有個別人上街抗議，但主流社會無言地服從。NZ人同歐美人點解咁大分別？

唔係誇張，連港人都不及。如果林鄭嗌封城，怕俾人媽到暈。

最近呢5年，全世界有2個最值得敬重既領導人。先係德國即將落台既長命總理安琪兒；然後就係NZ既Jacinda Ardern。兩個都係女人，Where have all the good men gone?

記得安琪兒俾人影到係超市推住架車買餸，老公唔喺身邊，當然也冇跟班。佢知道俾人影，但念落民主社會，嘴角帶的苦笑。

Jacinda女士則年前好似大咗肚，但因爲地震，推遲與男伴的婚禮，接着係任上生仔。

以上兩位女強人俾人公開既私生活，有華人怕覺得不成體統。但反過來正係佢地人格既光輝。