150221六年初三陰：今天赤口，認真《蜩螗》

   年初三赤口，但撞正兩個小親人BoD，今晚大party。
   晨早起來。知識報過完年復刊，送來社評《羊年伊始港事蜩螗》。最尾兩字從未聽聞，但斷估都唔係好嘢。懶查字典，電郵(我冇佢既WhatsApp)問最精通文學的朋友，順便恭喜發財（但老實講，我的朋友多已過了發財年齡－除非靠六合彩，或積下陰德飛來遺產）。
  友人轉眼就回郵(證明機不離手，隨時update)：
  蜩是蟬的別稱，螗也是一種小小的蟬，蟬聲吵耳，港事蜩螗是說香港仍有許多紛爭吵鬧。
   小時在廣州常聽蟬鳴。但只限於夏天。香港的鋼筋森林至少已有30年，蟬鳴不是40歲以下港人的記憶。用作社論標題，不知有冇10%的讀者有共「鳴」？還是說暗示：今夏吵一吵，秋涼就會靜，轉趨「河蟹」？
   說起隨時update，想起另一端的朋友。除了返工時被迫，退休後不用「腦」不聯網。居家唯一的外來訊息是：每日買報紙、固網電話和用了近20年的電視。手機只有2G，加上日常宅在家，只用三個月期的語音卡，平時不開，換言之只是備用電話。
   智能手機跌到千元後，有朋友好心，知道宅男冇收音機和相機，以生日禮物的名義送上高性價比的小名牌，讓其即使不付網絡費，也可以聽廣播影相。不料接著的幾個月，投訴不絕：電話響接唔到；點撥號㗎？想打給阿C，搵唔到佢電話既......。
   朋友好人做到底，多次上門教機，但發覺每次最多只能教一樣基本動作。第一次的問題是：機主只識叉電，唔識開機。教識佢㩒掣開機，一頭半月後又complain，因為唔知要滑屏才能進入「狀態」。學識滑屏後，第三次則唔知電話簿係邊.......
   又不能怪宅男，十日難得開一次機，智能機咁多功能，點記得你上次教過乜。我對好心的友人說，算啦，人各有志，佢冇需要，怕嫌你煩添。
   沉迷濫用令人痛恨網絡絕對有理。但否定所有用途則只能祝佢好運。